ԵՐԵՎԱՆ, 29 դեկտեմբերի — Sputnik. Արմեն Ջիգարխանյանի նախկին կնոջ` Վիտալինա Ցիմբալյուկ-Ռոմանովսկայայի ծանոթներից մեկն աղմկահարույց սկանդալի հանգուցալուծման սեփական տարբերակն ունի: Այս մասին գրում է Dni.ru-ն։
«Կարծում եմ` սցենարի խմբագիրները գրում են «Ամուսնալուծություն հայկական ձևով» սերիալի նախատոնական վերջին մասը։ Ըստ մտահաղացման` Ջիգարխանյանին կստիպեն դուրս գալ կարմիր վարդերի հսկայական փնջով, ծնկի իջնել և աղաչել, որ «ների ծեր հիմարին»։ Բոլորը համերաշխ կծափահարեն, Ռուդինշտեյնը, Պրոկլովան, Վլասովան, Մազուրը և մյուսները կվանկարկեն` ներե՛լ, ներե՛լ։ Մարդիկ կարտասվեն, իսկ դուք` փայելի մեջ ողողված, կներեք բեմի վարպետին։ Կբռնեք Ջիգարխանյանի ձեռքը։ Բոլորը շամպայն կխմեն», — իր ֆեյսբուքյան էջում գրել է Վիտալինայի ծանոթը։
82-ամյա դերասան Արմեն Ջիգարխանյանի և նրա 38-ամյա կնոջ` Վիտալինա Ցիմբալյուկ-Ռոմանովսկայայի մասին սկսեցին խոսել հոկտեմբերի առաջին տասնօրյակում, երբ դերասանը հայտնվեց հիվանդանոցում և հայտարարեց, որ պատրաստ չէ ներել իրեն ցավ պատճառած կնոջը։
Ավելի վաղ Ցիմբալյուկ-Ռոմանովսկայան, որ Ջիգարխանյանի ղեկավարած թատրոնում տնօրենի պաշտոն էր զբաղեցնում, սեփական ցանկությամբ հեռացել էր թատրոնից և հայտարարել, որ ցանկանում է ամուսնալուծվել։
Դրանից հետո Ջիգարխանյանը պաշտոնական նամակ էր ուղղել Մոսկվայի մշակույթի դեպարտամենտ` իրեն և թատրոնի արտիստներին «կոլեկտիվի նորմալ աշխատանքին խանգարող խաբեբաներից» պաշտպանելու խնդրանքով։
Հոկտեմբերի վերջին Արմեն Ջիգարխանյանի ղեկավարած թատրոնում հետաքննչական գործողություններ անցկացվեցին դերասանի կորցրած անձնագրի վերաբերյալ քրեական գործով։ Տեղեկացվեց նաև, որ խուզարկություն է անցկացվել Ցիմբալյուկ-Ռոմանովսկայայի բնակարանում, առգրավվել են արտասահմանյան անձնագիրը, բժշկական փաստաթղթերն ու Ջիգարխանյանի կտակը։
