ԵՐԵՎԱՆ, 2 հունվարի — Sputnik. Հայտնի դարձած «Աշոտ» երգի հեղինակ և կատարող Ելենա Եսենինան շնորհակալ է անցած տարվան՝ Հայաստանը բացահայտելու համար: Այդ մասին Եսենինան գրել է Facebook սոցցանցի իր էջում:
«Այնքան շնորհակալ եմ անցնող տարվան: Այն լի էր բացահայտումներով, այն ինձ համար բացահայտեց հրաշալի մի երկիր: Շնորհակալ եմ քեզ, Հայաստան: Շնորհակալ եմ, սիրելի Աշոտ: Դու անսպասելիորեն շրջեցիր իրադարձությունների ընթացքը: Տաղանդավոր մարդկանց աջակցության շնորհիվ «Հայաստան» երգի համար ահա այսպիսի մի տեսահոլովակ ենք ձայնագրել: Անչափ շնորհակալ եմ Տիգրան Ներսիսյանին առաջարկի, արձագանքի և հրաշալի կադրերի համար:
Երաժշտությունը սրտեր է միավորում: Իմ նվերը Հայաստանին՝ Նոր տարվա նախաշեմին», — գրել է Եսենինան:
«Հայաստան» երգի երաժշտությունն ու բառերը գրել է Եսենինան: Հայաստանի համայնապատկերը ներկայացնող տեսահոլովակն ու երգի հուզիչ տողերը ոչ ոքի անտարբեր չ ենթողենի:
«Դե երգի՛ր Հայաստան, երգի՛ր: Նռան սերմեր, Արարատի կանչ և գագաթին սպիտակ բամբակ», — երգում է Եսենինան:
Տեսահոլովակը երկու օրվա ընթացքում ավելի քան 9 հազար դիտում է հավաքել:
Ելենա Եսենինան Հայաստանում հայտնի է դարձել «Դե ինչ, Աշոտ» հիթի շնորհիվ։ Ավելի վաղ Ելենան հատուկ Sputnik Արմենիայի համար տեսահոլովակ էր ձայնագրել, որտեղ նա հայտարարել էր #АшотпозвониЛеночке հեշթեգով ֆլեշմոբի մասին` առաջարկելով ձայնագրել սեփական տեսահոլովակը: Հայ տղամարդիկ անպատասխան չէին թողել Լենայի կոչը:
Նոյեմբերի կեսերին Եսենինան այցելեց Երևան և հյուրընկալվեց Sputnik Արմենիայի տաղավարում, որտեղ «Աշոտ» երգը կատարեց խմբագրության աշխատակիցների նվագակցության ներքո։
Ելենա Եսենինան երիտասարդ երգչուհի է, բանաստեղծուհի ու երգահան, որն իր արվեստում համատեղում է փոփ ու ժողովրդական երաժշտության տարրերը։ Նա մի քանի հեղինակավոր մրցույթների դափնեկիր է, համագործակցել է հայտնի կատարողների հետ։
