ԵՐԵՎԱՆ, 17 հունվարի — Sputnik. Երգիչ Ֆիլիպ Կիրկորովը հաստատել է, որ այս տարի Մոլդովայի երաժիշտների հետ կմեկնի «Եվրատեսիլ»։ Այդ մասին նա հայտնել է Instagram իր էջում։
«Նույնիսկ երգն եմ արդեն գրել բարեկամական երկրներից մեկի համար։ Ամեն ինչ պատրաստ է», – հայտնել է արտիստը։
Կիրկորովի գրած My Lucky Day երգի համահեղինակը Ջոն Բալարդն է, երգում միահյուսվում են մոլդովական ժողովրդական ժոկ պարի ավանդույթները, առոգանության խիզախությունն ու չարաճճիությունը, նորաձև էլեկտրոնային գործիքավորումն ու EDM դիսկոտեկային երաժշտության թրենդները։
«Երբ նման արտիստներ եմ տեսնում, զգում եմ, որ պարտավոր եմ օգնել նրանց այնպես, ինչպես Ալլա Պուգաչովան օգնեց ինձ, երբ նոր էի սկսում կարիերաս», – գրել է նա։
Ֆիլիպը նշել է, որ համաձայնել է գրել ստեղծագործությունը, որովհետև Եվրոպական հեռարձակողների միության ղեկավարությունը փոխվել է։
Խոսքը One Lucky Day երգի մասին է, որ Ֆիլիպը գրել է մոլդովական Doredos խմբի համար։
Ինչպես գրել է Կիրկորովը, նա երիտասարդ երաժիշտների հետ ծանոթացել է «Նոր ալիք» մրցույթի ժամանակ։
Բացի այդ, երգիչը հույս է հայտնել, որ այս տարի Ռուսաստանին, վերջապես, կգնահատեն ըստ արժանվույն։
Որպես երգիչ Ֆիլիպ Կիրկորովը նույնպես մասնակցել է «Եվրատեսիլին»։ Սակայն 1995 թվականին Իռլանդիայում զբաղեցրել է ընդամենը 17-րդ հորիզոնականը (այս հորիզոնականից ներքև Ռուսաստանի մասնակիցները, կարծես թե, չեն իջել)։ Այնուհետև մասնակցել է որպես պրոդյուսեր։
Օգնել տարբեր երկրների արտիստներին. բելառուս Դմիտրի Կոլդունին (2007 թ.), ուկրաինուհի Անի Լորակին (2008), ադրբեջանցի Ֆարիդ Մամադովին (2013), բացի այդ աջակցել է նաև շվեդ Էրիկ Խալեդ Սաադին, հույն Սակիս Ռուվասին, բելառուս երգչուհի Անժելիկա Ագուրբաշին։ Արդյունքում նա դարձել է «Եվրատեսիլի» ռեկորդակիր, այն երկրների թվով, որոնց ներկայացուցիչների հետ աշխատել է։
Առավելագույն հաջողության է հասել 2008 թվականին, երբ համարվում էր Դիմա Բիլանի օգնական. վերջինս հաղթանակ տարավ Սերբիայում։
«Եվրատեսիլ 2018»–ն անցկացվելու է Լիսաբոնում մայիսի 8-12-ը։ Այս տարի «Եվրատեսիլին» կմասնակցեն 43 երկրի ներկայացուցիչներ։
