ԵՐԵՎԱՆ, 13 փետրվարի — Sputnik. Գարեգին արքեպիսկոպոս Բեքչյանի վերադարձով ավարտվում է Պոլսո Հայոց պատրիարքական տեղապահի ընտրության շուրջ մեկ տարի ձգվող պատմությունը, հայ համայնքը ստիպված ժամանակավորապես համակերպվում է թուրքական իշխանությունների կողմից պարտադրված Արամ Արքեպիսկոպոսի նշանակման հետ։ Sputnik Արմենիայի հետ զրույցում, մեկնաբանելով Գարեգին արքեպիսկոպոս Բեքչյանի հրաժեշտի նամակը` նման կարծիք հայտնեց Ստամբուլի «Ակոս» թերթի հայկական բաժնի խմբագրապետ Բագրատ Էստուկյանը։
«Թուրքահայ համայնքը շատ է սրտնեղել Գարեգին արքեպիսկոպոս Բեքչյանի հրաժեշտի նամակից»,- ասաց Էստուկյանը` միաժամանակ նշելով, որ հայ համայնքում անկումային տրամադրություններից բացի նաև վախի մթնոլորտ է ձևավորվել` Թուրքիայի իշխանությունների ճնշումների հետևանքով։
Բագրատ Էստուկյանը հիշեցրեց, որ կիրակի, երբ թուրքական իշխանությունների որոշմամբ Պոլսո Հայոց պատրիարքական տեղապահ կարգվելուց հետո Արամ արքեպիսկոպոսը պետք է քարոզեր Ստամբուլի հայկական Սուրբ Վարդանանց եկեղեցում, ստամբուլաբնակ սասունցի կին գրող Բեսսե Քաբաքը սկսել էր բարձրաձայն «Տեր ողորմեա» կանչել` թույլ չտալով արքեպիսկոպոսին սկսել իր խոսքը։ Ոստիկանները կնոջը դուրս են հանել եկեղեցուց, բերման ենթարկել ոստիկանություն ու պահել այնտեղ մի քանի ժամ` մինչև եկեղեցական քարոզի ավարտը։
Էստուկյանը, ներկայացնելով տեղի ունեցածը, խոր ցավ հայտնեց ոչ այնքան տեղի ունեցածի, որքան դրա նկատմամբ ներկաների վերաբերմունքի մասին։
«Ցավալին այն է, որ ոչ ոք չմիջամտեց` ո՛չ եկեղեցականները, ո՛չ քաղաքացիները։ Կարելի էր միջամտել ու ոստիկանների ձեռքից ազատել հայ կնոջը։ Բայց ոչ ոք չարեց դա»,- ասաց նա։
Էստուկյանի համոզմամբ` հայ հայերի նման պահվածքը ոչ թե անտարբերության, այլ Թուրքիայում առկա վախի մթնոլորտի հետևանք է, ընդ որում` ոչ միայն հայերի ու այլ ազգային փոքրամասնությունների, այլև հենց թուրքերի շրջանում։
«Ամբողջ ժողովուրդը ահ ու սարսափի մեջ է, որովհետև իշխանություններին անհաճո ցանկացած ձայն անմիջապես բանտարկությամբ է ավարտվում, ոչ մի օրինականություն չի մնացել երկրում։ Ոչ ոք բողոքելու, ընդվզելու համարձակություն չունի, այդ թվում` թուրքերը»,- ասաց հայ խմբագրապետը։
Հիշեցնենք, որ Գարեգին արքեպիսկոպոս Բեքչյանը, որին թուրքական իշխանությունները պաշտոնապես հրաժարվել են ճանաչել որպես Պոլսո Հայոց պատրիարքական տեղապահ, այսօր հայտարարել է, որ հեռանում է Թուրքիայից և հրաժեշտի նամակ է հրապարակել:
«Այս մութ արշավները շատ տգեղ չափերի հասան: Վախենում եմ, որ այս ամենն ավելի կմասնատի մեր համայնքը»,- նամակում գրել է Բեքչյանը։
Նա հույս է հայտնել, որ կատարվածն ուսանելի կլինի համայնքի համար։