ԵՐԵՎԱՆ, 19 փետրվարի — Sputnik. Երևանում վճարովի կայանատեղերի մեծամասնությունը պարզապես անօրինական են։ Այդ մասին այսօր լրագրողներին ասաց փաստաբան Արտակ Խաչատրյանը։
Նրա խոսքով` կարմիր գծերը երբեմն հասնում են մինչև խաչմերուկ, թեև ճանապարհային երթևեկության կանոններով չի կարելի այնտեղ կայանել։
«Նման դեպքերում վարորդն իրավունք ունի չվճարելու։ Կայանատեղերի օպերատորը հայց է ներկայացնում չվճարելու համար, բայց մենք գրեթե միշտ հաղթում ենք` ապացուցելով, որ կայանատեղին գտնվում է անօրինական վայրում», — ասաց Խաչատրյանը։
Ոստիկանությունը ջնջում է անօրինական վայրերում գծված նշանները, բայց օպերատորը նորից է գծում։
«Ամեն դեպքում մեզ այդպես է բացատրում ոստիկանությունը»,- ասաց նա։
Տնտեսագետ, «Տնտեսական իրավունքի կենտրոն» հասարակական կազմակերպության նախագահ Մովսես Արիստակեսյանը հիշեցրեց, որ օպերատորը գումար է վերցնում, բայց ոչ մի ծառայություն չի տրամադրում։
«Նրանք ոչ մի կերպ չեն երաշխավորում մեքենաների անվտանգությունը ո՛չ գողանալուց, ո՛չ վանդալիզմից։ Հարց է ծագում` նրանք ինչի համար են փող վերցնում», — նշեց տնտեսագետը։
Նշենք, որ Երևանում վճարովի կայանատեղերը պատկանում են քաղաքապետարանին։ Դրանք կառավարում և վարորդներից վճարներ է գանձում «Փարկինթ Սիթի Սերվիս» ընկերությունը։