ԵՐԵՎԱՆ, 21 փետրվարի — Sputnik. Հայտնի հաղորդավար, Comedy Woman նախագծի մասնակից Եկատերինա Վառնավան տեսահոլովակ է տեղադրել` աջակցելով «Եվրատեսիլ 2018» մրցույթում Հայաստանի պոտենցիալ մասնակից Kamil Show-ին։
Kamil Show —ն հայտնի հաղորդավար, դերասան և հումորիստ Արսեն Գրիգորյանի մշտական կերպարն է։ «Դեպի Եվրատեսիլի» YouTube-ի ալիքում Puerto Rico երգի տեսանյութը դիտել է ավելի քան 443 հազար մարդ։
«Իմ տգեղ ընկերուհին` @kamilshow_ն, որոշել է Եվրատեսիլում ներկայացնել Հայաստանը։ Իմ կարծիքով` փորձարկումը հաջողվել է։ Ով հավանեց երգը, թող ներբեռնի։ Փետրվարի 22-ին ազգային ընտրության կիսաեզրափակիչն է», — տեսանյութին կից գրել է Վառնավան։
Գրառումը 18 ժամվա ընթացքում դիտել են 74 հազար անգամ։
«Կլինի երկրորդ Վերկա Սերդյուչկան։ Այդ զգեստափոխումների բոլոր կրկնությունները։ Դա նույն բանն է, եթե կրկին հայտնվեր մորուքով կին (միայն թե ավելի երկար մորուքով)», — գրել է katarina_lashes_od-ը։
Ավելի վաղ հայ մասնակցին աջակցել է նաև Comedy Woman-ի հեղինակը` Նատալյա Եփրիկյանը։
Նշենք, որ «Դեպի Եվրատեսիլ» ազգային ընտրության առաջին հնգյակում, որը տեղի է ունեցել փետրվարի 20-ին, ընդգրկվել են Մհերը, Ռոբերտ Կոլոյանը, Գևորգ Հարությունյանը, Լուսինե Մարդանյանը և Nemra խումբը։
