Կուտակային կենսաթոշակային համակարգի ներդրումից հետո ֆինանսների նախարարությունը պարզել է, որ մասնակից քաղաքացիներին հիմնականում հետաքրքրում է իրենց ֆոնդը, դրա կառավարիչը, կուտակված գումարի չափը, ֆոնդի եկամտաբերությունը:
Այս մասին այսօր կառավարության նիստում հայտնեց Ֆինանսների նախարար Վարդան Արամյանը՝ կառավարությանն առաջարկելով պարզեցնել 2012-ին, կառավարության որոշմամբ հաստատված ձևը:
«Որոշման համաձայն`ֆոնդի կառավարչի ներկայացվող հաշվետվության վերջում կա աղյուսակ, որտեղ ցուցանիշները չափազանց շատ են, և դա խճճում է շահառուներին»,- ասաց նախարարը՝ առաջարկելով պարզեցնել աղյուսակը՝ դրանից հանելով որոշ ցուցանիշներ, որոնք մասնակիցներին գրեթե չեն հետաքրքրում:
Ֆինանսների նախարարությունն առաջարկում է հրաժարվել անհարկի ցուցանիշների հրապարակումից՝ հույս հայտնելով, որ դրանով ավելի օգտակար տեղեկատվություն կհաղորդեն կուտակային կենսաթոշակային համակարգի մասնակից քաղաքացիներին:
Կառավարությունը հաստատեց նախարարության առաջարկած որոշման նախագիծը:
