Լաուրա Սարգսյան, Sputnik Արմենիա
Լիոնի կենտրոնում գտնվող «Ինչ կա» հայկական ռեստորանն արդեն տևական ժամանակ գրավում է ֆրանսիացիների սրտերը։ Ռեստորանը հիմնել է ֆրանսահայ Արմեն Բայանդուրյանը։ Բայանդուրյանները հաստատվել են Լիոնում 1929 թվականից։ Այն ժամանակվանից նրանք առաջատար դիրքեր են զբաղեցնում երկրի բիզնես ոլորտում։
«Մենք երկար էինք մտածում` ինչպես անվանել հաստատությունը, որ միանգամից գրավի, լինի աչքի ընկնող ու ֆրանսիացիների համար հիշվող։ Հատկապես, որ մենք բացում էին այդ ռեստորանը աշխարհի ամենագաստրոնոմիական կենտրոններից մեկում` Լիոնում», — Sputnik Արմենիայի թղթակցի հետ զրույցում ասաց հաստատության սեփականատեր Արմեն Բայանդուրյանը։
«Ինչ կա» անվանումն առաջարկել է Բայանդուրյանի դուստրը, որը հոր հետքերով է գնացել ու միացել ընտանեկան բիզնեսին։
«Մի կողմից անվանումը զարմացնում է եվրոպացիներին, նրանք կանգ են առնում ռեստորանի առաջ, կարդում են անվանումը, մոտենում` հարցնում են մեզ` ինչ է նշանակում։ Իսկ հայերը, անվանումը տեսնելիս, առանց երկմտելու ներս են մտնում», — ասաց Բայանդուրյանը։
Ռեստորանի ճաշացանկում հայկական և լիբանանյան ուտեստներ կան։ Պատերին Հայաստանի բնապատկերներ են, եկեղեցիների, խաչքարերի նկարներ: Այստեղ կա նաև հայկական խոհանոցին նվիրված երկհատորյակ: Լիոնի հայերը հիմնականում Ցեղասպանությունից փախած հայերի հետնորդներ են կամ Լիբանանից տեղափոխվածները: Այդ պատճառով հայկական գրեթե յուրաքանչյուր ռեստորանում կարելի է լիբանանյան խոհանոցի ուտեստներ գտնել:
Ռեստորանի դիմաց «Բայանդուրյան» կոչվող խանութ կա, որտեղ ամբողջ աշխարհից, այդ թվում նաև Հայաստանից բերված մթերք կա:
Պահածոները, հայկական գինիները, մուրաբաները, տոլման շատ տարածված են ֆրանսիացիների շրջանում:
«Դու պետք է բոլոր հաճախորդներին գոհացնես, դրա համար խանութում ամեն տեսակ մթերք կա», — պարզաբանեց Բայանդուրյանը։
Խանութում ֆրանսիական գինու կողքին դրված են հայկական «Կարասը», «Արենին» և այլ գինիներ։ Ավանդական հայկական լավաշը, փախլավան ու տոլման հենց Լիոնում պատրաստում են հայ հրուշակագործն ու խոհարարը։
Խանութներում երկու տեսակի տոլմա են վաճառում` պահածոյացված և թարմ։ Պահածոյացված տարբերակը հարմար է, բայց նա, ով մեծ ընտանիք ունի (երկու հոգուց շատ), նախընտրում է կիլոգրամով գնել։
Բայանդուրյանը պարզաբանում է` ֆրանսիացիների մոտ տոլման միայն Հայաստանի հետ է ասոցացվում` չնայած ՅՈՒՆԵՍԿՕ-ի որոշումներին։
