ԵՐԵՎԱՆ, 31 մարտի — Sputnik. Ռուսական առաջին ալիքով հեռարձակվող «Ձայնը. երեխաներ» նախագծի հերթական փուլում 13 տարեկան Ռոբերտ Կասյանը (Կրասնոդար) Անտոն Մելնիկովի և Անգելինա Գալեցկայայի հետ կատարեց Volare երգը։
Պելագեան իր երեք սաներից ընտրեց Անգելինային։ Տղաներն իսկական ջենթլմենի պես պահեցին իրենց:
«Անչափ շնորհակալ եմ բոլոր նրանց, ովքեր աշխատել են այս նախագծի վրա։ Հիանալի փորձ էր և անմոռանալի տպավորություններ», — ասաց Ռոբերտը։
«Արդեն կարելի է գզգզվել, չէ՞», — ասաց հաղորդավար Դմիտրի Նագիևը` գզգզելով Ռոբերտի հարդարված մազերը։
«Իմ ելույթից, իհարկե, գոհ եմ։ Տխրության զգացողություն կա, բայց ոչ շատ։ Երևի որոշակի հույզեր չհերիքեցին և ձայնի մեջ ինչ-որ բան», — ասաց տղան հետնաբեմում։
Բայց ծնողների կարծիքը միանշանակ էր. «Դու հիանալի երգեցիր։ Կեցցես»։
Ավելի վաղ «Կույր լսումների ժամանակ» տղան կատարել էր «Parlami d'amore, Mariu» բարդ ստեղծագործությունը, որը գրել է Վիտտորիո Դե Սիկան «Որքան սրիկա են այս տղամարդիկ» ֆիլմի համար (էկրան է բարձրացել 1932 թվականին): Այս երգը կատարել են Դմիտրի Խվորոստովսկին, Խոսե Կարերասը և Պլասիդո Դոմինգոն: Իսկ Ռոբերտը կատարեց Ռոբերտինո Լորետտիի տարբերակը:
«Ձայնը. երեխաներ» նախագծի հինգերորդ եթերաշրջանը մեկնարկել է փետրվարի 2-ին։ Հոբելյանական եթերաշրջանի ժյուրիի կազմում են երգչուհի Պելագեան, երգիչ Վալերի Մելաձեն և ռեփեր Բաստան: Նախագծի հաղորդավարը Դմիտրի Նագիևն է:
