ԵՐԵՎԱՆ, 10 ապրիլի — Sputnik. ԱՄՆ-ի Բոստոն քաղաքում գտնվող «Հայկական ժառանգության պուրակում» տեղադրված շեղանկյունաձև արձանը, որը հայտնի է «Աբստրակտ քանդակ» անունով, թարմացվել է 2018 թվականի համար։ Այս մասին հայտնում է Northendwaterfront-ը։
Բոստոնի բնակիչներն ու հյուրերն ամեն տարի կարող են տեսնել, թե պողպատից և ալյումինից պատրաստված արձանն ինչպես է փոխում իր տեսքը։ Աբստրակտ շինությունը հնարավոր 24 կոնֆիգուրացիա ունի։ Արձանն իր տեսքը փոխեց 7-րդ անգամ։
Յուրաքանչյուր նոր փոխդասավորությունը նվիրված է բոլոր այն մարդկանց, որոնք ստիպված են եղել լքել իրենց պատմական հայրենիքը և հաստատվել այս քաղաքում։
«Աբստրակտ քանդակի» փոփոխումն ամեն անգամ տեղի է ունենում «Annual Reconfiguration of the Abstract Sculpture» հրահանգով, որը կազմել է պուրակի ճարտարապետ դիզայներ Դոնալդ Թալալիանը։ Արձանի ձևափոխության համար անհրաժեշտ գումար է հատկացնում The Charles G. and Doreen Bilezikian Fund-ը։
ՀՀ կենտրոնական բանկը երկու տարի առաջ 5000 դրամ անվանական արժողությամբ երկու արծաթե հուշադրամ էր մտցրել շրջանառության մեջ։ Դրանցից մեկի վրա փորագրված էր «Հայկական ժառանգության պուրակը»` այս ինքնատիպ արձանով։
«Հայկական ժառանգության պուրակը» Բոստոնում բացվել է 2012 թվականին և նվիրված է 1915 թվականին Օսմանյան կայսրությունում իրականացրած Հայոց ցեղասպանության զոհերին։
1915 թվականին տեղի ունեցած ոճրագործությունը, որի հետևանքով Օսմանյան կայսրությունում ավելի քան 1.5 մլն հայ է սպանվել, ХХ դարի առաջին ցեղասպանությունն է համարվում։ Թուրքիան ավանդաբար մերժում է ցեղասպանություն իրագործելու մեղադրանքներն ու անչափ ցավագին է ընդունում այդ հարցի վերաբերյալ քննադատությունները։
Հայոց ցեղասպանությունն առաջինը ճանաչել է Ուրուգվայը 1965 թվականին, այնուհետև նրա օրինակին են հետևել Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, Բրազիլիան, Չիլին, Վատիկանը, Բոլիվիան, Չեխիան, Ավստրիան, Լյուքսեմբուրգը։ ԱՄՆ նահանգների մեծ մասը պաշտոնապես ճանաչել և դատապարտել են Հայոց ցեղասպանությունը, ինչպես նաև ապրիլի 24-ը հայտարարել Հայոց ցեղասպանության զոհերի հիշատակի օր։
