ԵՐԵՎԱՆ, 19 ապրիլի — Sputnik. Ամենապահանջված ու ամենաբարձր վարձատրվող մասնագետը Հայաստանում ծրագրավորողն է։ Այսօր Sputnik Արմենիա մամուլի կենտրոնում, լրագրողների հետ հանդիպմանը հայտնեց տեխնիկական գիտությունների թեկնածու, կարիերայի staff.am հարթակի համահիմնադիր Լուիզա Ավետիսյանը։
«Աշխատանքի հայտարարությունների շուրջ 19 տոկոսը ծրագրավորման ոլորտի հետ կապված մասնագիտություններն են։ Ընդ որում, այս մասնագիտության պահանջարկը աշխատաշուկայում ոչ միայն չի նվազում, այլև աճի միտում ունի»,- ասաց նա։
Ծրագրավորողներից ավելի նվազ պահանջարկ ունեն վաճառքի աջակցման մասնագետները, ՏՏ այլ ոլորտի մասնագետները` ցանցային ադմինիստրատորներ, համակարգչային մասնագետներ։
Ամենացածր պահանջարկն ունեն կրթության ոլորտի մասնագետներն ու գրասենյակային աշխատողները։
Հայաստանյան աշխատաշուկայի 95 տոկոսը, Լուիզա Ավետիսյանի դիտարկմամբ, կենտրոնացած է մայրաքաղաքում և միայն 5 տոկոսը` մարզերում։ Իսկ մարզային քաղաքներից ամենաակտիվը Գյումրին է։
Ինչ վերաբերում է աշխատավարձերին, 1000 մասնագետների շրջանում կատարված հարցումների համաձայն` մեր երկում ամենաբարձր աշխատավարձը ստանում են ծրագրավորողներն ու ՏՏ ոլորտի այլ մասնագետները։ Նրանց աշխատավարձը, փորձառությունից ու մասնագիտական հմտություններից կախված, տատանվում է 400-800 հազարի սահմանում։
Երկրորդ տեղում նախագծերի կառավարիչներն են, որոնք 200-800 հազար աշխատավարձ են ստանում։ Բանկային, ֆինանսական ոլորտում աշխատավարձերը 250-470 հազար դրամ են, մարքեթինգային գովազդի ոլորտում աշխատավարձը հասնում է 500 հազարի, մարդկային ռեսուրսների կառավարման ոլորտում` 320 հազարի։ Լրագրողների աշխատավարձը 100-300 հազար է։
Տունը թողել, գյուղ են գնացել. ի՞նչն է ստիպել աղջիկներին գյուղի դպրոցի ուսուցչուհի դառնալ
Ամենացածր աշխատավարձերը կրթության ոլորտում են` մինչև 100 հազար դրամ, առավելագույնը, որ ներկայացրել են այս ոլորտը ներկայացնող հարցվածները, եղել է 200 հազար դրամը։
Հետաքրքական է նաև, որ Հայաստանում ամենաբարձր աշխատավարձն իրենց աշխատակիցներին վճարում են միջազգային կազմակերպությունների գրասենյակները։
