ԵՐԵՎԱՆ, 21 հունիսի — Sputnik. Առողջապահության նախարարությունը հայտարարում է` Երևանի կենդանաբանական այգու կենդանիների շրջանում տուբերկուլոզ չկա։
Նախարարության հաղորդագրության համաձայն` ֆլյուրոգրաֆիկ հետազոտությունների են ենթարկվել նաև այգու աշխատակիցները։ «Հատուկ ուշադրության է առնվել այն աշխատակիցների առողջական վիճակը, ովքեր անմիջական շփում ունեն կենդանիների հետ»,– հայտնում է նախարարությունը` հավելելով, որ որևէ աշխատակցի մոտ տուբերկուլոզի վարակ չի հայտնաբերվել։
Հիմք ընդունելով կատարված հետազոտությունների արդյունքները` նախարարությունը հայտարարում է` այգի այցելություններն անվտանգ են, այնտեղ գտնվելը որևէ առողջական խնդիր չի ենթադրում:
Հիշեցնենք, որ Երևանի կենդանաբանական այգում ձմռանը սատկել են մի քանի կենդանիներ, այդ շրջանում այնտեղ այցելուներ չեն եղել։ Կենդանիների անկման պատճառը տուբերկուլյոզն է։ Հիվանդության առաջին զոհը դարձել է քարայծը, այնուհետև սատկել են լամաները, կամերունյան այծը և եղջերուները։
Այգու աշխատակիցները, թեև հայտարարում էին, որ այսօր այգի այցելելը վտանգավոր չէ, քանի որ հիվանդ կենդանիներ չկան, սատկածներն էլ վնասազերծվել են, բայց ՀՀ Առողջապահության նախարարությունը խոստացել էր այգում հետազոտություններ իրականացնել` մինչ այդ կոչ անելով այցելուներին լինել ուշադիր։
