ԵՐԵՎԱՆ, 1 հուլիսի — Sputnik. Ռուսաստանի, ԱՄՆ-ի, Ֆրանսիայի, Ավստրալիայի, Արգենտինայի, Իտալիայի, Արցախի և այլ երկրների ավելի քան 400 երիտասարդներ կհավաքվեն Հայաստանում` «Հայրենիք՝ Սուրբ Էջմիածին» կարգախոսի ներքո:
Նրանք հնարավորություն կունենան ներկայացնել Ամենայն հայոց կաթողիկոս Ն.Ս.Օ.Տ.Տ. Գարեգին Բ-ին իրենց տեսլականը եկեղեցում առկա խնդիրների լուծման վերաբերյալ, ինչպես նաև, ինչու ոչ, շատ սելֆի անեն։ Այդ մասին Sputnik Արմենիային հաղրոդեց Հայ առաքելական եկեղեցու Համահայկական երիտասարդության միության ղեկավար Գևորգ Մկրտչյանը։
Ինչպես նշեց Մկրտչյանը, հավաքի ընթացքում կքննարկվեն ՀԱԵ թեմերի միջև համագործակցության հարցեր, համատեղ սոցիալական, մշակութային և բարեգործական ծրագրերի իրագործման հնարավորություններ։
«Գարեգին Բ-ն 2018թ-ը հայտարարել է երիտասարդության տարի, և այդ հավաքը կազմակերպվել է հենց այդ համատեքստում։ Երիտասարդներն արդեն սկսել են ժամանել։ Նրանց մի մասն առաջին անգամ է Հայաստանում և անհամբերությամբ սպասում է ծրագրի մեկնարկին ու Ամենայն հայոց կաթողիկոսի, ինչպես նաև այլ հոգևորականների և բարձրաստիճան պաշտոնյաների հետ հանդիպմանը», — նշեց Sputnik Արմենիայի զրուցակիցը։
Նշենք, որ վերջին շրջանում ՀԱԵ շուրջ կրքերը չեն հանդարտվում։ Մասնավորապես հունիսի 6-ից «Նոր Հայաստան, նոր պատրիարք» նախաձեռնությունը բողոքի ակցիաներ է կազմակերպում՝ պահանջելով կաթողիկոսի հրաժարականը։ Միաժամանակ, Մայր աթոռի դիվանապետ, եպիսկոպոս Արշակ Խաչատրյանն արդեն հայտարարել է, որ Գարեգին 2-րդը չի պատրաստվում հրաժարական տալ։
Facebook-ի օգտատերերից մեկը կոչ էր արել վարչապետ Նիկոլ Փաշինյանին «ազատել մարդկանց կաթողիկոսից», սակայն նա հայտարարել էր, որ մտադիր չէ միջամտել եկեղեցու գործերին։
