ԵՐԵՎԱՆ, 9 հուլիսի — Sputnik. ՀՀ վարչապետ Նիկոլ Փաշինյանի որդին՝ Աշոտ Փաշինյանը, մեկնում է զինվորական ծառայության։ Այսօր վաղ առավոտից նա ներկայացել է զինկոմիսարիատ, որտեղ նրան ուղեկցել են մորեղբայրը՝ պատգամավոր Հրաչյա Հակոբյանը, հորեղբայրն ու ընկերները։
Զինկոմիսարիատից դուրս գալուց հետո, մինչ հավաքակայան հասնելը Աշոտ Փաշինյանն ու մյուս զորակոչիկները օրհնություն են ստացել Սուրբ Խաչ եկեղեցում։
Եկեղեցու բակում նրանց զինծառայության են ճանապարհել ուրախ երգ ու պարով։ Պարային խմբերի պարին է միացել նաև վարչապետի որդին։ Այստեղ է եկել նաև մայրը` Աննա Հակոբյանը։
Աշոտ Փաշինյանը լրատվամիջոցներին ասել է, որ դրական է տրամադրված ու կարծում է, որ սպասվող 2 տարիները հանգիստ ու հետաքրքիր կանցնեն:
Եկեղեցու բակից զորակոչիկներն ուղևորվել են կենտրոնական հավաքակայան, որտեղ արդեն պարզ կդառնա` ով ուր կմեկնի ծառայության։
Հիշեցնենք, որ Աշոտ Փաշինյանն ավելի վաղ հայտնել էր, որ դիմում է ներկայացրել՝ ծառայությունն Արցախում անցկացնելու համար։
«Որոշել եմ ինքնակամ դիմում գրել ու ծառայությունս անցնել Արցախի Հանրապետությունում։ Միշտ եղել եմ այն կարծիքին, որ այս պահին արցախյան հակամարտությունում խաղաղություն հաստատելը հայկական կողմի ձեռքերում է, դրա միակ արժանապատիվ ու արդյունավետ ճանապարհը հայկական բանակի, արցախյան բանակի հզորացումն է»,- ասել էր Աշոտը։
2018 թվականի ամառային զորակոչը մեկնարկել է հուլիսի 2-ից և կտևի մինչև հուլիսի 31-ը։
