ԵՐԵՎԱՆ, 7 օգոստոսի — Sputnik. 28-ամյա երիտասարդի սպանության կասկածանքով ձերբակալվել է «Վարդա» գիշերային ակումբի 34-ամյա տնօրենը։ Հայտնում է ՀՀ Քննչական կոմիտեն։
Սպանության փաստով հարուցված քրեական գործի շրջանակներում իրականացված գործողությունների արդյունքում պարզվել է, որ օգոստոսի 6-ի վաղ առավոտյան ակումբի 28-ամյա այցելուի և գիշերային ակումբի տնօրենի միջև տեղի է ունեցել վիճաբանություն, որը վերածվել է ծեծկռտուքի։
Դրա մասնակիցներն օգտագործել են կտրող-ծակող առարկա, որի հետևանքով այցելուն տեղում մահացել էր, իսկ ակումբի տնօրենը` կտրած-ծակած վնասվածքներով տեղափոխվել բժշկական կենտրոն։
Հիշեցնենք՝ օգոստոսի 6-ին, ժամը 05:45 ոստիկանության Մասիսի բաժին ահազանգ էր ստացվել, որ Երևան- Երասխավան ավտոճանապարհին՝ «Վարդա» գիշերային ակումբի մոտ որովայնի շրջանում կտրած-ծակած մարմնական վնասվածքով հայտնաբերվել է Այնթափ գյուղի բնակիչ, 28-ամյա Արթուր Սահակյանի դին։
