ԵՐԵՎԱՆ, 10 օգոստոսի — Sputnik. Առողջապահության նախարարությունը ստուգումներ է իրականացնում Երևանի Ֆիզիոթերապիայի ինստիտուտում։ Այս մասին Sputnik Արմենիային հայտնեց առողջապահության նախարար Արսեն Թորոսյանը։
«Գուցե թվի մեջ սխալվեմ, բայց մոտ 30 մլն դրամի անհամապատասխանություն է գտնվել»,– ներկայացնելով անցկացված ստուգման արդյունքները`ասաց Թորոսյանը։
Նա նաև նշեց, որ անհամապատասխանությունը հայտնաբերելուց հետո բժշկական հաստատությունների հետ քննարկվում է դրանց վերականգնելու հնարավորությունը։
«Քննարկվում է` պետք է վերականգնվի՞, թե՞ պետք է հանվի այս տարվա բյուջեից»,– ասաց նախարարը։
Ֆիզիոթերապիայի ինստիտուտում ստուգումներն ավարտելուց հետո նախարարությունն անցնելու է տուբերկուլյոզի դեմ պայքարի ազգային ծրագրով ծախսված գումարների ստուգմանը։
Ստուգումները, նախարարի խոսքով, ինքնանպատակ չեն։ «Հաստատություններ են եղել, որ երկար տարիներ չեն ստուգվել, և առնվազն մեկ անգամ մաքուր թղթից սկսելու խնդիր կա, որպեսզի հաստատությունները հասկանան` արդյոք ի՞նչ արել են պիտի շարունակեն, թե՞ ոչ և մեր մոտեցումներն ընդունեն։ Ոչ մի հավելագրում, ոչ մի չբուժված հիվանդի գումար պետությունից չի գանձվելու»,– ասաց նա։
Ի դեպ, եթե նույնիսկ նախկինում ստուգումներ եղել են, դրանք ոչ մի հետևանք չեն ունեցել` ո՛չ ֆինանսական, ո՛չ կարգապահական։
Հիշեցնենք` Երևանի «Սուրբ Գրիգոր Լուսավորիչ» ԲԿ-ում կատարված ստուգումների արդյունքում նախարարությունը 300 միլիոն դրամի չարաշահում էր հայտնաբերել, որից հետո աշխատանքից ազատվել էր ԲԿ տնօրեն Արա Մինասյանը:
