ԵՐԵՎԱՆ, 30 օգոստոսի — Sputnik. Ծննդով Ալժիրից կանադացի դերասան Մուստաֆա Արամիսը 1915 թվականին Օսմանյան կայսրությունում Հայոց ցեղասպանությունից մազապուրծ եղած փախստականների մասին թատերական պիեսում գլխավոր դերը կխաղա։ Այս մասին գրում է կանադական Le Soleil պարբերականը։
Ամերիկացի դրամատուրգ Ռիչարդ Կալինոսկու «Գազան լուսնի վրա» պիեսում նա մարմնավորում է գլխավոր դերը` փախստական Արամ Թովմասյանին։
Նշվում է, որ 32-ամյա Մուստաֆան հանդես է եկել հիմնականում երգիծական դերերում։ Սա նրա առաջին դրամատիկ դերն է, որը, կարծես, նրա համար լինի։ 20-ականների Ամերիկայում Արամն ուզում է իր նման ամեն ինչ կորցրած Սեդայի հետ ընտանիք կազմել։
«Բավական ուժեղ կերպար է, սակայն միևնույն ժամանակ անվերջ թույլ։ Նա պարզ պատկերացնում է, թե ինչպես պետք է շարունակի ապրել վերապրածից հետո։
Սակայն նոր կյանքի մասին Արամի երազանքներում այդ աղջիկը, կարծես, տեղ չունի։ Եվ Արամը փորձում է երազանքն ու իրականությունը մեկտեղել», – ասում է Մուստաֆան։
Մուստաֆան հայերենին չի տիրապետում։ Սակայն 11 տարեկանում նա իմացավ, թե ինչ է փախստական լինելը։ 1990-ականներին նրա ընտանիքը փախել է Ալժիրից, որտեղ քաղաքացիական պատերազմ էր։
2014 թվականին Մուստաֆան ընդունվում է Դրամատիկ արվեստի ինստիտուտ։ Որդու ընտրությունն այնքան էլ հոր սրտով չէր։ Կյանքում շատ բան տեսած հայրն ուզում էր, որ որդին մշտական և հուսալի ապրուստի միջոց ունենա։ Սակայն որդուն հաջողվեց համոզել հորը և նա սկսեց զբաղվել արվեստով։
