ԵՐԵՎԱՆ, 5 սեպտեմբերի — Sputnik. Հայտնի բլոգեր, դիմահարդարման վարպետ Գոհար Ավետիսյանն առաջին անգամ մեծ հարցազրույց է տվել «Супер» առցանց-պարբերականին։
Երիտասարդ գործարարը խոսել է ընտանիքի ու մանկական վիրավորանքների մասին, որոնք նրան դարձրել են Ռուսաստանի թիվ մեկ դիմահարդարը։
Գոհարը ծնվել է 1993 թվականին Մարտունիում, որտեղ ապրել է Ավետիսյանների ընտանիքը։ Գոհարը մեկ տարեկան չի եղել, երբ ծնողները որոշել են Մոսկվա տեղափոխվել։ Նա մանկուց սիրել է շպար անել, նկարել ու բեմ բարձրանալ։
Գոհարը դպրոցում է բախվել մարդկային դաժանությանը։ Նրան վիրավորական խոսքեր են ասել տեղացի չլինելու համար։
«Ես խնդիրներ ունեի, ինձ չէին ընդունում, որովհետև Հայաստանից էի, ինձ «խաչիխա» էին անվանում, ասում էին «յախք, մազոտ ձեռքերը»… Արևելյան աղջիկներից շատերն ունեն այդ խնդիրը։ Ասում էին, որ ես գեր եմ, բայց կարծում եմ, որ դա շատ հարցերում ինձ օգնել է, ու այդ ջղայնությունը թույլ է տվել ինձ կատարելագործվել ու բոլորին տեղը դնել», — խոստովանել է Գոհարը։
Վիրավորանքները միայն ուժեղացրել են դիմահարդարման թագուհուն ու առանձնանալու առիթ են տվել նրան ։ Ավետիսյանը երազել է երգչուհու ու դերասանուհու կարիերայի մասին, բայց խիստ հայրը դեմ է եղել։
Սակայն հորը չի հաջողվել զսպել աղջկան, և նա ի վերջո բեմ է դուրս եկել, բայց արդեն դիմահարդարման շնորհիվ։
Գոհար Ավետիսյանը Ռուսաստանում ամենահայտնի բյութի-բլոգերն է։ Հիմա նա Instagram-ում ավելի քան հինգ միլիոն բաժանորդ ունի, իսկ նրա «Կերպարանափոխություն» նախագիծը քննարկվել է անգամ Daily Mail-ի էջերում։
