ԵՐԵՎԱՆ, 6 սեպտեմբերի — Sputnik. Գլխավոր դատախազությունում ուսումնասիրվում են Սուրիկ Խաչատրյանի առանձնատան վերաբերյալ «Հետք»-ի հրապարակման մեջ ներկայացված հանգամանքները:
Այս մասին Sputnik Արմենիային տեղեկացրեցին դատախազության աշխատակազմի հանրային կապերի բաժնից:
«Ուսումնասիրության նպատակով ՀՀ գլխավոր դատախազության պետական շահերի պաշտպանության վարչությունը Երևանի քաղաքապետարանից և ՀՀ անշարժ գույքի կադաստրի կոմիտեից պահանջել է տեղեկատվություն և փաստաթղթեր: Ուսումնասիրության արդյունքների մասին կհայտնենք լրացուցիչ»,- ասացին դատախազությունից:
Տեղեկացնենք նաև, որ «Հետք»-ը օգոստոսի 24-ի հրապարակել է «Սուրիկ Խաչատրյանն իր առանձնատունը 8 տարի կառուցել է առանց շինթույլտվության» վերնագրով հոդված, որտեղ տան շինարարության հետ կապված մի շարք խնդիրներ են վեր հանված:
