ԵՐԵՎԱՆ, 2 հոկտեմբերի — Sputnik. Ազգային ժողովն այսօր հերթական նիստը սկսեց մեկ րոպե լռությամբ` հարգանքի տուրք մատուցելով աշխարհահռչակ երգիչ-երգահան Շառլ Ազնավուրի հիշատակին:
«Ես ոչ միայն կորցրի ազգի զավակին, այլև իմ գործընկերոջը, որի հետ երկրաշարժից հետո համագործակցել ենք հանուն երեխաների, հանուն Հայաստանի ապագայի»,- ասաց ԱԺ նախագահ Արա Բաբլոյանը:
Նրա խոսքով` աշխարհն Ազնավուրին հավերժ կհիշի ոչ միայն նրա բարի կեցվածքի, ազնիվ մոտեցումների, այլև այն ամենի համար, ինչ նա տվեց ոչ միայն հայ ազգին, այլ ամբողջ աշխարհին:
Համաշխարհային հռչակ է ձեռք բերել 1956թ.-ին Փարիզի դահլիճներից մեկում հաջող ելույթից հետո։ Նրա գրած երգերը կատարել են Էդիտ Պիաֆը, Լայզա Մինելին, Մստիսլավ Ռոստրոպովիչը, Հուլիո Իգլեսիասը, Շերը, Ջո Դասենը, Ռեյ Չարլզը և այլք։
Շառլ Ազնավուրը միջազգային ասպարեզում ռեկորդային թվով ձայնասկավառակ է վաճառել (180 մլն)։
