ԵՐԵՎԱՆ, 22 հոկտեմբերի – Sputnik, Արմենուհի Մխոյան. Աշխատանքի և սոցիալական հարցերի նախարարի պաշտոնակատար Մանե Թանդիլյանը հոկտեմբերի 22-ին Գյումրի է մեկնել օրեր առաջ Ֆրիտյոֆ Նանսենի անվան գիշերօթիկ հաստատություն բակում պոլիէթիլենային տոպրակում հայտնաբերված երկվորյակ տղաների հարցով: Նախարարը Գյումրիում մասնակցել է ընդլայնված նիստի, որի ժամանակ քննարկվել է երեխաների հետագա ճակատագիրը:
Հիշեցնենք, որ Գյումրու մանկատան բակում հայտնաբերված նորածինների մայրը հոկտեմբերի 19-ին հրաժարվել է երեխաներից։
Նիստից հետո նախարարը լրագրողներին տեղեկացրեց՝ արվելու է ամեն ինչ, որպեսզի երեխաները մեծանան կենսաբանական ընտանիքում: «Մենք այսօր պետք կարողանանք ճիշտ որոշում կայացնել: Մեր երկրում ծնվել են 2 առողջ, հրաշալի տղաներ, և մենք պետք է օգնեք, որ տղաները մեծանան իրենց ծնողների հետ ընտանիքում: Մենք պետք է պաշտպանենք և աջակցենք ընտանիքին: Ես անելու եմ ամեն բան, որ երեխան մեծանա ծնողի հետ: Նպատակը մեկն է` ծնողը պետք է վստահ լինի, որ երեխայի պաշտպանությունը և խնամքը մինչև վերջ մեր ուշադրության կենտրոնում է»,- ասաց նա։
Թանդիլյանը խոսեց Ֆ.Նանսենի անվան գիշերօթիկ հաստատության, Գյումրու Երեխաների տան, ոստիկանության, Շիրակի մարզպետարանի ներկայացուցիչների կատարած աշխատանքի մասին։
«Ծնողը շատ արագ հայտնաբերվել է, մոր հետ զրույց է եղել, և հույս ունեմ, որ այդ զրույցների արդյունքը հետագայում դրական կլինի: Երեխաներն այս պահին առողջ են և շատ լավ ձեռքերում են, ապահով: Մենք պատրաստ ենք աջակցել ընտանիքին, որպեսզի կարողանանք երեխաներին վերադարձնել ընտանիք: Այս պահին իրավական գործընթացն այնպիսին է, որ մայրը հրաժարվել է երեխաներից, բայց մենք կարծում ենք, որ քննարկման հնարավորություն կա»,-ասաց նախարարը։
Թանդիլյանը հայտնեց նաև, որ պատրաստվում է հանդիպել երեխաների մոր հետ:
«Մենք պետք է միջոցներ ձեռնարկենք, որպեսզի ծնողն իմանա, որ երեխան պաշտպանված է լինելու։ Թե ինչպես և ինչ միջոցներով, դեռ քննարկման առարկա է: Չեմ ուզում մանրամասնել, բայց դա չպետք է լինի այն պայմանը, որով մայրը ուզենա իր երեխայի հետ ապրել։ Ես վստահ եմ, որ եթե այս երեխաները լույս աշխարհ են եկել, ուրեմն ծնողն ունի մայրական զգացմունքներ»:
Քանի որ այս գործով քրեական գործ է հարուցվել, նախարարի պաշտոնակատարը վստահեցրեց, որ այդ հարցով ևս ինքը կհանդիպի քննչական կոմիտեի աշխատակիցների հետ՝ ծնողների և երեխաների համար լավագույն լուծումը գտնելու համար:
Իսկ եթե այնուամենայնիվ, այսքանից հետո ծնողը կրկին հրաժարվի երեխաներից, գործողությունները կիրականացվեն ըստ ընթացակարգի: Ի դեպ, երկվորյակներին աջակցելու կամ որդեգրելու ցանկություն հայտնողների թիվը այս պահին էլ ավելանում է:
Հիշեցնենք, որ հոկտեմբերի 17-ին, ժամը 20.00-ին, Գյումրու Շիրակացի թիվ 10 հասցեում գտնվող Ֆ.Նանսենի անվան գիշերօթիկ հաստատությունից ոստիկանության Մուշի բաժին ահազանգ է ստացվել, որ հաստատության բակում հայտնաբերել են երկու բարուրված նորածին տղա երեխաներ:
Մեկնած օպերատիվ խումբը պարզել է, որ նույն հաստատության աշխատակիցները ժամը 19.40-ին հաստատության բակում, գետնին դրված պոլիէթիլենային տոպրակի մեջ բարուրված վիճակում հայտնաբերել են երկու նորածին տղա երեխաների:
Ոստիկանության ծառայողների ձեռնարկած օպերատիվ-հետախուզական միջոցառումների շնորհիվ պարզվել է գիշերօթիկ հաստատության բակում հայտնաբերված երեխաների մոր ինքնությունը: Նա Արարատի մարզի 18-ամյա բնակչուհի է։
