ԵՐԵՎԱՆ, 29 հունվարի — Sputnik. Մանկապարտեզների աշխատակիցների աշխատավարձը Երևանում 20 տոկոսով կբարձրանա։
Այս մասին այսօր ավագանու նիստից հետո լրագրողների հետ զրույցում հայտարարել է Երևանի քաղաքապետ Հայկ Մարությանը։
«Երևի մարտի վերջին կամ ապրիլի վերջին դա կիրականացնենք: Ծրագրից առայժմ դուրս են մնում տնօրեններն ու փոխտնօրենները», - ասել է Մարությանը:
Նա նշել է, որ Երևանի քաղաքապետարանը հայտարարում է քաղաքի զարգացմանն ուղղված բաց մրցույթ, ընդհանուր ֆոնդը՝ 1 մլն ԱՄՆ դոլարին համարժեք դրամ:
«Հանձնարարել եմ, որպեսզի քաղաքապետարանի աշխատակազմը ստեղծի օնլայն հարթակ այդ մրցույթի համար: Քաղաքապետարանը տրամադրում է 1 մլն դոլարին համարժեք դրամ՝ ուղղված այն ծրագրերին, որոնք կմտածեն հենց Երևանի բնակիչները:
Իրենք կմտածեն այդ ծրագրերը, իրենք կներկայացնեն դրանք ու իրենք էլ կքվեարկեն», - ընդգծել է Երևանի քաղաքապետ Հայկ Մարությանը:
Ըստ նրա՝ ամենաշատ ձայն ստացած ծրագրերը կիրականացվեն, դրանք կարող են լինել մինչև տասը: Քաղաքապետը շեշտել է, որ օնլայն քվեարկությունները կվերահսկվեն, որ կեղծ քվեարկություններ չլինեն:
Նշենք, որ Երևանի մանկապարտեզների աշխատակիցների աշխատավարձերը մինչև 100 հազար դրամ են։ Այն սահմանում են համայնքապետարանները։ Այդ պատճառով մարզերում այն խիստ տարբերվում է։
