ԵՐԵՎԱՆ, 15 փետրվարի –Sputnik. Հայտնի շոումեն, «Comedy Club»–ի գեղարվեստական ղեկավար Գարիկ Մարտիրոսյանի կինը` Ժաննա Լևինան, Instagram–ի իր բաժանորդներին ցույց է տվել` ինչպես է ամուսինն անցկացրել 45-ամյակը։
Նրա հրապարակած լուսանկարում հայկական այբուբենի ֆոնին կանգնած է Գարիկ Մարտիրոսյանի ստվարաթղթե «քանդակը», իսկ Գարիկի ձեռքում ցուցանակ է, վրան գրված` «Հումորիստի կնոջ ամուսինը»։
«Ամուսինս երեկ ամբողջ օրը տանն է անցկացրել, պարզապես տոն էր», – լուսանկարին կից գրել է նա։
Նրա բաժանորդների արձագանքը չի ուշացել։ Գարիկին շնորհավորել են ծննդյան օրվա, իսկ Ժաննային` Վալենտինի օրվա առիթով։ Շատերը որոշել են կատակել և հաճոյախոսություն անել. «Ինչ գեղեցիկ նկար է կախված ձեր տանը։ Ես էլ ուզեցի», «Հոգնե՞լ ես` ամբողջ օրը ոտքի վրա անցկացնելով», «Գոնե բազմոցին պառկած չէր», «Որտեղ կարելի է պատվիրել նման կանգուն և չնյարդայնացնող արձան, ուզում եմ ինձ համար էլ պատվիրել նույնից»։
Շոումենը հաճախ է զվարճալի գրառումներ անում սոցցանցերում, բայց նրա կինը`Ժաննա Լևինան, հետ չի մնում ամուսնուց։ Նա նույնիսկ «Հումորիստի կնոջ օրագիրը» վերնագրով գիրք է հրատարակել։
