ԵՐԵՎԱՆ, 20 փետրվարի — Sputnik. Բնական մթերքի անվան տակ այսօր Հայաստանում վաճառվում է արհեստականորեն ստացված սնունդ։ Լրագրողների հետ հանդիպման ժամանակ այս մասին ասաց «Սպառողների ազգային ակադեմիա» հասարակական կազմակերպության մոնիտորինգի բաժնի ղեկավար Ռուբեն Հասրաթյանը։
Օրինակ` թթվասերի փաթեթավորման վրա շատ փոքր տառատեսակներով գրեթե աննշմարելի գրված է «թթվասերային մթերք» և դրա ստացման համար կաթնային յուղի փոխարեն օգտագործվել է բուսայուղ։ Բայց արտադրողի խաբեությունը հասկանալու համար սպառողը պետք է մասնագիտական գիտելիքներ ունենա սննդի անվտանգության ոլորտում։
«Կան տատիկներ, ծերեր, որոնք նույնիսկ եթե տեղեկացված լինեն, խանութում չեն կարող տեղում կարդալ այդ մանր տառերը, և այդ ապրանքը գնում են թթվասերի փոխարեն։ Նույն տուփով, նույն լոգոյով, նույն ապրանքանիշով արտադրում են` շփոթություն ստեղծելու համար։ Սա մոլորեցնելու նպատակ է հետապնդում»,– ասաց նա։
Հասրաթյանն անդրադարձավ նաև Հայաստանում կաթնամթերքի արտադրության մեջ լայնորեն կիրառվող կաթի փոշու խնդրին։ Նա հորդորեց արտադրողներին տուփի վրա պարտադիր մակնշել,որ սննդամթերքի պատրաստման մեջ կիրառվել է կաթի փոշի։ Իսկ ներկրողներին էլ խորհուրդ տվեց առավել անվտանգ երկրներից ներկրել այն։
«Այսօր Հայաստան մեծ քանակությամբ կաթի փոշի է ներկրվում, մեծ մասը` Ուկրաինայից»,– ասաց նա` հավելելով, որ մեծ հարգանք տածելով այդ երկրի ու այդ ժողովրդի նկատմամբ` միաժամանակ պետք չէ մոռանալ Չերնոբիլի աղետի ու դրա` մինչ օրս չվերացված ցավալի հետևանքների մասին։
Սպառողների ազգային ակադեմիա» հասարակական կազմակերպության նախագահ Մելիտա Հակոբյանն էլ նշեց, որ Հայաստանը տարիներ շարունակ համարվել է անորակ նյութերի իրացման տարածք։
Որպես ասվածի ապացույց` նա հիշեց 90-ական թվականներին Հայաստան ներկրվող ու մեծ սպառում ունեցող հյութերի փոշիները։
«Ես շատ էի զարմանում, թե այդ սոցիալապես վատ պայմաններում մարդիկ ինչքան էին դրանք գնում։ Ոնց որ այդ հյութերը մեզ պետք է կշտացնեին»,– ասաց նա։
Վերջին տարիներին, Հակոբյանի դիտարկմամբ, գունանյութեր ու քիմիական տարբեր հավելումներ պարունակող սնունդը հայաստանյան վաճառակետերում նվազել է, բայց չի վերացել։
«Նոր տարուց հետո ինձ զանգահարեցին, ասացին` շուկայից ձուկ ենք գնել։ Եփելիս ջուրը կարմրել է, ջրից հանելուց հետո էլ խռիկներից կարմիր ջուր է հոսում»,– պատմեց նա։
Լաբորատոր հետազոտություններն ապացուցել են, որ ձուկը ներկված է եղել` կարմիր իշխանի անվան տակ վաճառելու համար։ Բայց թե ինչ գունանյութ է կիրառվել, հետազոտությունները չեն բացահայտել։
Սպառողների շահերի պաշտպանը հորդորում է զերծ մնալ անբնական գույն ունեցող մթերքներ գնելուց և հիշեցնում` բնական մթերքը նման վառ գույն ունենալ չի կարող։
