ԵՐԵՎԱՆ, 3 ապրիլի — Sputnik. Եղանակային պայմաններով պայմանավորված` ՀՀ ԱԻՆ «Հիդրոմետ» ծառայության օդերևութաբանության կենտրոնի պետ Գագիկ Սուրենյանն այսօր Facebook սոցիալական ցանցում գրառում է արել, որը կատակելու թեմա է դարձել մարդկանց համար։
«Եթե ապրիլի 7-ին Երևանում ջերմաստիճանը հասնի +18 աստիճանի, գոհ կլինե՞ք»,– գրել է Սուրենյանը։
Տոն օրվա «տոնական» եղանակի հեռանկարը բարձրացրել է Սուրենյանի ֆեյսբուքյան հետևորդների տրամադրությունը։ Նրանցից շատերը հումորով են արձագանքել եղանակային կանխատեսմանը։
Ընթերցողներից մեկը գրառումը կարդալուց հետո եզրակացրել է, որ «Սուրենյանն արդեն պատվերներ է ընդունում», մեկ ուրիշը նույնիսկ այդ եղանակի դիմաց Սուրենյանի սահմանած գինն է հարցնում։
Մեկ այլ ընթերցող էլ խոստացել է այդ դեպքում այլևս չպահանջել նրա հրաժարականը, մյուսն էլ խորոված է խոստացել։
Մեկն էլ նշել է, որ Գագիկ Սուրենյանի այս կանխատեսումը ապրիլի 7-ի առիթով «կանանց սրտերը նվաճելու» փորձ է։
««Մի հատ էլ թուշդ կպաչենք, էդ էլ հարցա՞», «էտ մարզերում էլ ապրիլի 7 չկա, հա՞», «վանաձորցիներն էլ Երևան գան, որ ջանները գոլ գցեն...»»,– գրել են նրա էջի բաժանորդները։
Նշենք, որ ԱԻՆ պաշտոնական կայքում հրապարակված տեղեկության համաձայն` Երևանում ապրիլի 6-7-ը ժամանակ առ ժամանակ սպասվում է անձրև, հնարավոր է ամպրոպ, ջերմաստիճանն էլ չի գերազանցի +14 աստիճանը։
Սուրենյանի գրառմանը հաջորդած մեկնաբանություններն ու like–երը դեռ ավելանում են։
