ԵՐԵՎԱՆ, 20 ապրիլի — Sputnik. Ձյուն է տեղացել նաև Հայաստանի ամենատաք վայրում` Մեղրիում։ Facebook սոցիալական ցանցի իր էջում այս մասին գրել է ՀՀ ԱԻՆ հիդրոմետ ծառայության օդերևութաբանության կենտրոնի պետ Գագիկ Սուրենյանը։
«Չնայած ձյան տեղումներին, այնուամենայնիվ վնասներ չեն լինի, քանի որ ձյան տեղումները դիտվել են +2...+3 ջերմաստիճանի պայմաններում»,– գրել է նա։
Սուրենյանը հրապարակել է նաև ձնով պատված ծառերի լուսանկարները։
ՀՀ արտակարգ իրավիճակների նախարար Ֆելիքս Ցոլակյանը երեկ հայտնել էր, որ այսօր նոր ցիկլոն է գալու Հայաստան, բայց ցրտահարության վտանգ չկա:
«Ապրիլի 20-21-ը վերջին շաբաթվա ամենացուրտ օրերը կլինեն: Վաղը օդի ջերմաստիճանը կրկին կնվազի՝ 5-7 աստիճանով։ Սակայն ըստ մեր կանխատեսումների՝ ցրտահարություն Արարատյան դաշտում և ցածրադիր գոտիներում չի լինելու»,-ասել էր նախարարը:
Նախարարը հայտնել էր, որ օդի ջերմաստիճանը գիշերը նվազելու է շատ քիչ, և զրոյից ցածր ջերմաստիճան չի գրանցվելու:
