14:34 20 հուլիսի 2019
Ուղիղ եթեր
  • USD476.48
  • GBP596.79
  • EUR535.52
  • RUB7.56
Վահան Թադեւոսեան

Ականի պայթումէն տուժած սակրաւորը որոշած է վերադառնալ Սուրիա. երեխաները կը խաղան ականներով

© Photo : provided by V.Tadevosyan
Հասարակություն
Ստանալ կարճ հղումը
Sputnik Արմենիան` արևմտահայերենով (229)
15510

Փոխգնդապետ Վահան Թադեւոսեան ամէն օր կը վերյիշէ Սուրիոյ մէջ տեսած թշուառութիւնը` սոված, ոտաբոբիկ, կիսամերկ երեխաներ, որոնց համար ամենահետաքրքիր խաղալիքը դաշտին մէջ դրուած ականն է: Ան ամէն օր հեռախօսով կը խօսի Սուրիա մնացած կրտսեր գործընկերներուն հետ ու կը սպասէ այն օրուան, երբ կը կարենայ դարձեալ միանալ անոնց:

ԵՐԵՒԱՆ, 26 ապրիլի — Նելլի Դանիէլեան, Sputnik. Մարտի 7–ին Սուրիոյ մէջ մարդասիրական առաքելութիւն իրականացնելու ընթացքին վիրաւորուած հայ սակրաւոր Վահան Թադեւոսեան այժմ Հայաստան է, տան մէջ: Ան կ’ապաքինուի Սուրիոյ մէջ ստացած ծանր վիրաւորումէն ու կը պատրաստուի վերականգնողական բուժման յաջորդ` կազմողական վրահատութեան փուլին:

Բայց նոյնիսկ տունէն օրական կը զանգահարէ, կը խօսի Սուրիա աշխատող իր երիտասարդ գործընկերներուն հետ: Վերջին հեռախօսազրոյցն ալ մեր զրոյցէն վայրկեաններ առաջ ունեցած էր: Մեր դիտարկման, թէ աւելի շատ ինք կը քաջալերէ անոնց` մոռնալով իր վնասուածքին մասին, Վահան Թադեւոսեան պատասխանեց. «իմ փորձն ու իրենցը նոյնը չէ»:

Сопер Ваган Тадевосян
© Photo : provided by V.Tadevosyan
Վահան Թադեւոսեան

«Ինծի պատահած դէպքէն ետք տղաները որոշ ժամանակ մը չէին կրնար աշխատիլ: Անոնք, որոնք այդ պահուն իմ կողքս եղած են, վախցած էին: Բայց ես միշտ իրենց հետ կը զրուցեմ, որ այդ վախն անցնի»,– ըսաւ ան:

Հայ սակրաւորներն արդէն 3 ամիս է` Սուրիոյ մէջ մարդասիրական առաքելութիւն կ’իրականացնեն: Իսկ անոնց հրամանատար փոխգնդապետ Վահան Թադեւոսեան անհամբեր կը սպասէ կազմողական վիրահատութեան ու կը վստահեցնէ, որ պիտի վերադառնայ ծառայութեան ու անպայման պիտի մեկնի Սուրիա`շարունակելու ընդհատուած առաքելութիւնը:

Սակրաւորներու համար Սուրիոյ մէջ գործ շատ կայ, Վահան Թադեւոսեանի հաշուարկով` տարիներու գործ: Անոր խօսքով` ականներն այդ երկրին մէջ ամէնուր են, չկան ականապատուած տարածքներու մասին յստակ տեղեկութիւններ, քարտէզներ: Մասնագէտներուն ատոնց տեղերուն մասին կը յուշեն միայն տեղացիները, որոնք մատնացոյց կ’ընեն, թէ որ տարածքին մէջ ականներ պայթած են, ուր խեղուած ու մահացած են իրենց երեխաները:

«Մեզի կը մօտենային մարդիկ, որոնց երեխաներն արդէն զոհուած կամ վիրաւորուած էին ականներու պայթումէն: Կը խնդրէին, որ մաքրենք այդ տարածքները: Շատ կան չպայթած ռումբեր, որոնք երեխաներուն կը հետաքրքրեն, կը մօտենան, ձեռք կու տան, կը պայթին»,– կը պատմէ փոխգնդապետը:

Հայ սակրաւորներն իրենց առաքելութեան առաջին իսկ օրէն դարձած էին սուրիացի երեխաներու հաւատարիմ ընկերները, որոնցմէ միշտ կարելի է քաղցրաւենիք ստանալ:

Թադեւոսեան կը պատմէ, որ յաճախ կ’այցելէր դպրոցներ` երեխաներուն բացատրելու, թէ ինչ է ականն ու ինչու պէտք է ատկէ հեռու մնալ:

«Դպրոց ըսուածը քանի մը դասարանէ բաղկացած փոքր շինութիւններ էին: Կ’երթայի, հետս կը տանէի թխուածքաբլիթներ, քաղցրեղէն, ինչ որ այդ պահուն ունէինք մեր մօտ: Մենք այնտեղ փոքր տուփերով կաթ կը ստանայինք, որ չէինք խմեր, հետս կը տանէի, կը բաժնէի երեխաներուն»,– կը պատմէ հայ հրամանատարը:

Сопер Ваган Тадевосян
© Photo : provided by V.Tadevosyan
Վահան Թադեւոսեան

Սուրիայէն մնացած ամենածանր տպաւորութիւնը Վահան Թադեւոսեանի համար այդ երբեմնի ծաղկուն երկրին մէջ տիրող համատարած թշուառութիւնն է:

«Գիւղերուն մէջ նոյնիսկ տուներ մտած եմ: Մութ, գետնափոր հիւղակներ են, գետնին ինչ–որ փալասներ դրած են, որոնց վրայ կը քնանան: Ոտաբոբիկ, կիսամերկ, ո՛չ կօշիկ ունին, ո՛չ հագուստ»,– կը յիշէ ան:

Իսկ հայերուն Սուրիոյ մէջ ամենայն յարգանքով կը վերաբերին: Ու ոչ միայն այն պատճառով, որ հայ սակրաւորներն իրենց կեանքի գնով կը փորձեն փրկել սուրիացի երեխաներու կեանքը:

Սուրիոյ մէջ հայուն ճանչցած ու եղբայրական ժողովուրդ կոչած են դեռ 100 տարի առաջ: 1915թ–ին Սուրիա ապաստան գտած, ցեղասպանութենէն փրկուած հայ ժողովուրդն այսօր ինք օգնութեան ձեռք մեկնած է իր պապերը փրկած արաբներուն:

Արդէն 1 դար հայերուն Սուրիոյ մէջ կը ճանչնան որպէս աշխատասէր, բանիմաց ու, ամենակարեւորը, շիտակ մարդիկ:

«Սուրիացի բարձրաստիճան զինուորականներէն մէկն ինծի օր մը պատմեց, որ 100 տարուան ընթացքին Հալէպի մէջ ոեւէ հայ յանցանքի համար չէ դատուած: Ըսաւ` եթէ անգամ փորձես ըսել, թէ հայը ինչ–որ բան գողցած է , քեզի մարդ չի հաւատար»,– պատմեց Վահան Թադեւոսեան:

Այսօր հազարաւոր հայեր դեռ կը շարունակեն ապրիլ Սուրիոյ մէջ ու հակառակ ծանր պայմաններուն, չեն հեռանար իրենց ծննդավայրէն:

Վահան Թադեւոսեանին Սուրիոյ մէջ ՀՀ դեսպանատան տրամադրած տուեալներով` այդ երկրին մէջ այսօր 7-8 հազար հայ կայ, որմէ 4-5 հազարը` Հալէպի մէջ:

Փետրուար 8–ին ՀՀ պաշտպանութեան նախարարութիւնը 83 հոգիէ բաղկացած մասնագէտներու խումբ մը գործուղած էր Սուրիա` մարդասիրական առաքելութիւն իրականացնելու:

Մարտ 7–ին առաքելութեան անդամ, փոխգնդապետ Վահան Թադեւոսեան ականի պայթումէ մը վիրաւորուած էր, որմէ յետոյ անոր աջ ոտնաթաթն անդամահատուած էր:

թեմա:
Sputnik Արմենիան` արևմտահայերենով (229)

Ըստ թեմայի

ՀՀ կառավարութիւնը 13 մլն դրամ փոխհատուցում տուաւ սուրիահայերու անձնագիրներու համար
Հայոց ցեղասպանութեան թեման` սուրիական դպրոցներու ուսումնական ծրագիրներուն մէջ
Այստեղ, գլուխդ կը դնես բարձին, գիտես` քու հայրենիքդ է. սուրիահայու երազանքը իրականացա՞ւ

Գլխավոր թեմաներ