ԵՐԵՎԱՆ, 29 ապրիլի — Sputnik. Երգչուհի Ալսուի դուստրը` Միկելա Աբրամովան, մեղավոր չէ, որ տաղանդավոր է։ Ալսուի ներկայացուցիչ Նինա Պոնոմարյովան այս մասին գրել է Hello! ամսագրի գլխավոր խմբագիր Մարինա Սավելևայի Facebook–յան էջի մեկնաբանություններում։
Նա հայտնել է, որ Միկելան հինգ տարեկանից երազել է նախագծին մասնակցելու մասին, ամեն օր աշխատում է իր վրա ու մի քանի երաժշտական գործիք է նվագում։
«Միկելան ի՞նչ մեղք ունի։ Մեղավոր է, որ տաղանդավո՞ր է։ Թե դա հիմար կարծրատիպ է` եթե տաղանդից բացի գումար էլ կա, ուրեմն ամեն ինչ գնվա՞ծ է։ Մեր դեպքում կարող եմ ասել` ոչ», – գրել է Պոնոմարյովան։
Նա նաև նշել է, որ Միկելայի համար եզրափակիչ փուլի երգ չէին պատրաստել, քանի որ չէին մտածում, որ նա կհաղթի քվեարկության արդյունքում։
Հիշեցնենք` «Ձայնը. երեխաներ» հեռուստանախագծի սուպերեզրափակիչ փուլի քվեարկության արդյունքում հաղթեց երգչուհի Ալսուի ու գործարար Յան Աբրամովի դուստրը` տասը տարեկան Միկելան` հավաքելով ձայների 56,5%–ը։ Սուպերեզրափակիչի հաղթողի կոչման համար պայքարում էին նաև Վալերի Կուզակովն ու Երժան Մաքսիմը։
Նշենք` եզրափակիչ փուլում Միկելա Աբրամովան շատ ուժեղ մրցակիցներ ուներ, որոնց թվում էին նաև Ռոբերտ Բագրատյանն ու Միքայել Գրիգորյանը։
