ԵՐԵՎԱՆ, 3 մայիսի — Sputnik. Տաքսու վարորդներն իրենց ավտոմեքենաներով փակել են Աբովյան փողոցն ու Մաշտոցի պողոտան և պահանջում են լուծել Կորյուն փողոցի խաչմերուկում կայանելու խնդիրը։
Տաքսիստների խոսքով` ՃՈ–ում իրենց հայտնել են, որ շուտով կլուծվի տաքսիների նշանի հարցը, սակայն արդեն երկար ժամանակ է` այդ խնդիրը չի լուծվում։ Իսկ տաքսիստներին նոր տուգանքներ են գալիս։
Տաքսիստները պնդում են, որ մեկ ամիս է անցել, բայց այդ ակտերը չեն չեղարկվում և նորերն են գալիս։ Վարորդները տասնյակ հազարավոր դրամի տուգանքներ են կուտակել։
Նրանք հայտարարում են, որ մեքենաները դուրս կբերեն միայն այն ժամանակ, երբ տեղադրվեն թույլատրող նշանները։
Իրավապահ մարմինները փորձեցին վարորդներին համոզել, որ հանդիպեն Ճանապարհային ոստիկանության պետի հետ և լուծեն հարցը, բայց տաքսիստները հայտարարեցին, որ իրենք բազմաթիվ անգամ են եղել այնտեղ, բայց ապարդյուն։
ՃՈ ներկայացուցիչները հայտարարեցին, որ բոլոր ակտերը չեղյալ կհայտարարեն, բայց վարորդները հրաժարվում են լքել երթևեկելի հատվածը։ Միջադեպի վայր է ժամանել ՃՈ–ի պետ Եգոր Կարապետյանը։