ԵՐԵՎԱՆ, 14 մայիսի — Sputnik. Մինչև 2023 թվականը ՀՀ մի շարք քաղաքացիներ կունենան արժանապատիվ աշխատանք։ Այսօր ստորագրվեց «Արժանապատիվ աշխատանք» ազգային ծրագիրը` ՀՀ աշխատանքի և սոցիալական հարցերի նախարարության, Աշխատանքի միջազգային կազմակերպության գրասենյակի, Հայաստանի գործատուների հանրապետական միության և արհմիությունների կոնֆեդերացիայի միջև։
ՀՀ աշխատանքի և սոցիալական հարցերի նախարար Զարուհի Բաթոյանի խոսքով` ծրագիրը կներառի ամբողջ Հայաստանը։ «Ծրագիրը երեք գերակայություն ունի. առաջինն աշխատանքային իրավահարաբերությունների կարգավորումն է, որտեղ օրենսդրության վերանայում կլինի։ Գերակայություններից երկրորդը զբաղվածության քաղաքականության բարելավվումն է, այսինքն` կանանց ու տղամարդկանց, խոցելի խմբերի հավասար հնարավորությունների ստեղծումը։ Երրորդ գերակայությունն էլ սոցիալական երկխոսությանն է ուղղված, որը ենթադրում է գործատուների միության և շահագրգիռ այլ կողմերի հետ սերտ համագործակցություն»,–ասաց նա։
Նախարարի խոսքով` գաղտնիք չէ, որ կան ոլորտներ, որտեղ մարդու աշխատանքային իրավունքներն այնքան էլ պաշտպանված չեն, ինչի համար էլ իրենք օրենսդրական ակտերի բարելավման կգնան։ Բաթոյանը հայտնեց նաև, որ մինչև սեպտեմբեր կմշակվի զբաղվածության ռազմավարությունը։
«Կարծում եմ՝ այսօր քան երբևէ, մեզանից ակնկալիքները մեծ են Հայաստանում։ Նոր կառավարությունը կարևորում է աշխատանքի խրախուսումը, և դա չի տեսնում առանց աշխատանքային իրավունքների պաշտպանության։ Այս իմաստով լուրջ անելիք ունենք»,–ասաց նախարարը:
Աշխատանքի միջազգային կազմակերպության Եվրոպայի և Կենտրոնական Ասիայի տարածաշրջանային գրասենյակի տնօրեն Հանց Քոլլերն էլ նշեց, որ իրենք ուսումնասիրել են հայկական աշխատաշուկան ու որոշ նկատառումներ ունեն։
«Ուսումնասիրության արդյունքում հայտնաբերել ենք, որ ստացած կրթության և աշխատաշուկայում պահանջների անհամապատասխանություն կա, բացի այդ, աշխատանքային օրենսդրությունը վերանայելու անհրաժեշտություն կա։ Գիտենք նաև, որ Հայաստանում բարձր է ոչ ֆորմալ զբաղվածության տոկոսը»,–ասաց նա։
Նա նաև հայտնեց, որ արժանապատիվ աշխատանք ասելով` դրսում հասկանում են աշխատանք, որի դիմաց մարդն արժանապատիվ վարձատրվում է, ինչպես նաև աշխատանքային համապատասխան պայմաններ, որոնք, օրինակ, աշխատակցի առողջությունը չեն վատթարացնում։
