03:20 23 օգոստոսի 2019
Ուղիղ եթեր
  • USD475.91
  • GBP577.33
  • EUR527.40
  • RUB7.25
Վթար երևանի Մյասնիկյան պողոտայում

Հայաստանի մէջ վարորդներու տուգանքները կը նուազին, բայց վարորդական իրաւունքէն կը զրկուին

© Sputnik / Rouben Abrahamian
Հասարակություն
Ստանալ կարճ հղումը
Sputnik Արմենիան` արևմտահայերենով (229)
87 0 0

ՀՀ ոստիկանութիւնը ընդհանուր փոփոխութիւններ կ’առաջարկէ Ճանապարհային երթեւեկութեան օրէնքներուն մէջ: Նոր փոփոխութիւններու հետեւանքով վարորդներուն կը տրուին միաւորներ, իսկ խախտման պարագային` կը զրկուին ատոնցմէ:

ԵՐԵՒԱՆ, 16 մայիսի — Sputnik. ՀՀ ոստիկանութիւնը լայնածաւալ փոփոխութիւններ  կ’առաջարկէ ճանապարհային երթեւեկութեան եւ անվտանգութեան  շարք մը օրէնքներու մէջ:

Օրինագիծերու ծրագրաշարով առաջարկուող փոփոխութիւններն այսօր կառավարութեան նիստին ներկայացուց ՀՀ ոստիկանապետի տեղակալ Յովհաննէս Քոչարեան:

Անոր խօսքով` նոր օրէնքով կը նախատեսուի 100 խախտումէն 26–ի պարագային նուազեցնել այսօր գործող տուգանքներու չափերը` 10–ի պարագային` մինչեւ 50 տոկոսով, 16-ի պարագային ` 50 եւ աւելի տոկոսով:

«Մեր կանխատեսումներով, պիւտճետային մուտքերը այս փոփոխութիւններու հետեւանքով կը կրճատուին շուրջ 2.7 մլր դրամով, բայց այն զգալիօրէն կը թեթեւցնէ քաղաքացիներու ընկերային կամ վարչական բեռը»,– ըսաւ Քոչարեան:

Բայց տուգանքները մեղմելուն զուգահեռ պիտի ներդրուին երթեւեկութեան անվտանգութիւնն ապահովող այլ միջոցներ` մասնաւորապէս` տուգանային միաւորներ:

Ըսել է թէ`ոստիկանութիւնը կ’առաջարկէ խախտումներ ընող վարորդներուն պատժելու միաւորներու մեքենականութիւն  ներդնել: Յովհաննէս Քոչարեանի ներկայացմամբ` վարորդական իրաւունք ստացող վարորդին պիտի տրուի 9 միաւոր: Իւրաքանչիւր խախտում թոյլ տալու պարագային այդ միաւորները պիտի նուազին 0.5-4 միաւորի չափով` կախուած խախտման տեսակէն  ու ծանրութենէն:

Եթէ մէկ տարուան ընթացքին վարորդին տրուած 9 միաւորները սպառին, ան 6 ամիս ժամկէտով  կը զրկուի վարորդական իրաւունքէն: 6 ամիսը լրանալէն ետք վարորդական իրաւունքը կը վերականգնուի եւ դարձեալ կը տրուի 9 միաւոր: Երկրորդ 9 միաւորը մէկ տարուան ընթացքին սպառելու պարագային  վարորդը վարորդական իրաւունքէն կը զրկուի արդէն 1 տարի ժամկէտով, եւ վարորդական իրաւունքը կը վերականգնուի միայն քննութիւն յանձնելէ յետոյ:

Ի դէպ, վարորդական իրաւունքէն ժամանակաւորապէս զրկուած վարորդներուն իրաւունք կը տրուի մինչեւ ժամկէտի լրանալը տեսական քննութիւն յանձնել ու աւելի շուտ վերականգնել կորսնցուցած իրաւունքը: Ոստիկանութեան համոզմամբ`այս կարգը կը նպաստէ, որ վարորդները պարբերաբար թարմացնեն ՃԵԿ իրենց գիտելիքները:

«Պատահարներու վիճակագրական տուեալները կը շարունակեն մնալ մտահոգիչ: Ակնյայտ է, որ տուգանքներու բարձրացումը, որ նախորդ տարիներուն իրաւախախտումներուն արձագանքելու գրեթէ միակ գործիքն էր, այլեւս ի զօրու չէ նուազեցնել պատահարներու թիւն ու մեղմել ատոնց հետեւանքները: Աւելին` ատոնց բարձրացումը ընկերային  լուրջ դժգոհութիւններու պատճառ  հանդիսացած է»,–ըսաւ Քոչարեան` միաժամանակ կարեւորելով վարորդներու գիտելիքներու բարձրացումը:

Ի դէպ, առաջարկուող օրէնքներով, անսթափ վիճակի մէջ վարելու համար գործող 150 000 տուգանքի փոխարէն պիտի սահմանուի 29 000 դրամ տուգանք, բայց միաժամանակ անսթափ վարորդէն  պիտի հանուի 4 տուգանային միաւոր: Իսկ մէկ տարուան ընթացքին խախտումը կրկնելու պարագային վարորդը 6 ամիսով կը զրկուի վարորդական իրաւունքէն: Իսկ եթէ անսթափ վարորդը հանրային փոխադրամիջոցի կամ թաքսի կը վարէ, ապա ան հէնց առաջին խախտման պարագային կը կորսնցնէ վարորդական իրաւունքը` 6 ամիսով:

Միաւորներու հաշուարկը համապատասխանեցուած է այսօր գործող տուգանքներու չափերուն:

Այսպէս` 5000 տուգանք նախատեսող խախտումները կը հաշուարկուին 1 միաւորի չափով, 20-25 000 դրամանոց խախտումները` 2 միաւոր: 3 միաւորի խախտումները երկուքն են`  ինքնաշարժի հաշուառման համարանիշն այլ անձի յանձնելը եւ սահմանուած արագութիւնը 31-50 քմ/ժամ–ով գերազանցելը, որուն համար գործող օրէնքով նախատեսուած է 100 000 դրամ տուգանք: Իսկ 4 միաւոր կը հանուի սահմանուած արագութիւնը 51-80 քմ/ժամ–ով գերազանցելու եւ անսթափ վիճակի մէջ ինքնաշարժ վարելու համար:

«Յարգելի քաղաքացիներ, մի կորսնցնէք ձեր միաւորները» ,– նախագիծերու ներկայացումէն յետոյ քաղաքացիներուն կոչով դիմեց նիստը վարող ՀՀ փոխվարչապետ Տիգրան Աւինեան:

Երկարատեւ ու հանգամանալից քննարկումէ յետոյ կառավարութիւնը հաստատեց օրինագիծերու ծրագրաշարը, որ յառաջիկային կը ներկայացուի ԱԺ–ի հաստատման:

թեմա:
Sputnik Արմենիան` արևմտահայերենով (229)

Ըստ թեմայի

Հայերուն չէք ընդունիր, միջազգային խաղեր մի կազմակերպէք. յայտնի մեկնաբանը` Ատրպէյճանին
«Արթուրը կնքուած է եւ կը յաճախէ հայկական եկեղեցի». հայ տղուն մօր պարզաբանումը
Իսլամութիւն ընդունած տղուն դէպքը Փայլան կ’որակէ երեխայի շահագործում

Գլխավոր թեմաներ