ԵՐԵՎԱՆ, 1 հունիսի — Sputnik. Երևանի գլխավոր պողոտայի զբոսահամալիրը, որը գտնվում է Սարյան-Մաշտոց հատվածում, արդեն պատրաստ է հյուրեր ընդունել. այսօր կայացել է այգու բացման արարողությունը։ Այս մասին տեղեկացնում է «Տաշիր» ընկերությունների խումբը։
Լուսային էֆեկտներով ցայտող շատրվանների ինքնատիպ կոմպոզիցիա, ժամանակակից մանկական խաղահրապարակներ և զբոսանքի գոտիներ, տարածքի ընդհանուր կանաչապատում և բարեկարգում. այս ամենն այսօրվանից հնարավորություն ստացան գնահատելու ինչպես երեխաները, այնպես էլ մեծահասակները։
«Զբոսայգում տնկվել են մոտ 10 հազար տնկիներ: Զբոսայգու բարեկարգման գլխավոր շեշտադրումը եռաչափ պրոյեկցիայով ցայտող շատրվանների անսամբլն է, որը թույլ է տալիս ստեղծել պատկերներ և անցկացնել ջրալուսային էֆեկտներով շոուներ երաժշտության ուղեկցությամբ: Շատրվանները բաղկացած են 600 ջրային շիթերից, որոնք ցայտում են մինչև 90 մետր բարձրությամբ և բարդ տեխնիկական շոուներ ու հնարքներ ստեղծելու հնարավորություն տալիս»,–նշված է հաղորդագրության մեջ:
Սարյան-Մաշտոց հատվածում գտնվող նոր հանգստի գոտու բարեկարգման աշխատանքները մեկնարկել էին 2015թ.–ին: Շինարարության նախաձեռնողը և հովանավորը «Տաշիր» բարեգործական հիմնադրամն է, որի հիմնադիր նախագահը Սամվել Կարապետյանն է: Ծրագրի ընդհանուր արժեքը կազմել է 15 մլն ԱՄՆ դոլար։
Երևանցիները նոր այգի ունեն. բացմանը ներկա էր Նիկոլ Փաշինյանը
«Տաշիր» ընկերությունների խմբի առաջին փոխնախագահ Նարեկ Կարապետյանը համոզված է, որ նոր համալիրը կդառնա մայրաքաղաքի նորացման խորհրդանիշը, մեր քաղաքի ամենասիրված և ամենահաճախ այցելվող վայրերից մեկը:
