ԵՐԵՎԱՆ, 13 հուլիսի - Sputnik. Արդեն մի քանի ժամ է՝ Ամուլսարի հանքավայրի տարածքում լարված իրավիճակ է ոստիկանների ու բնապահպան-ակտիվիստների միջև: ՀՀ քննչական կոմիտեի տեղեկատվության և հասարակայնության հետ կապերի բաժնի պետ Նաիրա Հարությունյանը Facebook-ում տեղեկացրել է, որ առավոտյան քննիչն ու փորձագետները փորձաքննության իրականացման նպատակով կազմակերպել են այց Ամուլսարի հանք, սակայն քաղաքացիները թույլ չեն տվել նրանց մուտք գործել հանքի տարածք:
«Փորձաքննության կատարումը հնարավոր դարձնելու համար նախաքննական մարմինը դիմել է ոստիկանությանը՝ խմբի անարգել մուտքը ապահովելու համար»,- գրել է նա:
ՀՀ ոստիկանության հասարակայնության հետ կապերի և լրատվության վարչության պետի տեղակալ Էդգար Ջանոյանն էլ Sputnik Արմենիայի հետ զրույցում հայտնեց, որ Ամուլսարի տարածքում քննչական գործողությունների իրականացմանը խոչընդոտելու պատճառով քաղաքացիներ են բերվել Ոստիկանության բաժին:
Ավելի վաղ բնապահպան-ակտիվիստ Շահանե Խաչատրյանը Facebook-ում գրել էր, որ Ամուլսարի տարածքում լարված իրավիճակ է. վաղ առավոտից տեղացիներն ու բնապահպանները հավաքվել են Ամուլսարի մուտքի մոտ՝ թույլ չտալու փորձագետների մուտքը հանքի տարածք: Նա նաև նշել է, որ ոստիկանությունն ու քննչական կոմիտեն բանակցում են տեղացիների հետ՝ պահանջելով բացել ճանապարհը:
«Լիդիան Արմենիա» ընկերությունը հայտարարություն է տարածել՝ տեղեկացնելով, որ հարուցված քրեական գործի շրջանակում իրակացնվող փորձաքննական այցն իրենք չեն նախաձեռնել, այլ Քննչական կոմիտեն, պարզապես ընկերության երկու փորձագետներ ևս ուղեկցել են Քննչական կոմիտեի քննիչներին և փորձագետներին։
Հիշեցնենք, որ Ամուլսարի ոսկու հանքը պաշարների առումով Հայաստանի երկրորդ հանքավայրն է, որը շահագործելու համար արտոնագիր է ստացել Lydian International դուստր ընկերությունը` GeoTeam-ը (ավելի ուշ վերանվանվել է Lydian Armenia)։ Ամուլսարի լեռնագագաթը գտնվում է Վայոց Ձորի և Սյունիքի մարզերի սահմանագլխին՝ Ջերմուկ քաղաքից 10 կմ հեռավորության վրա:
Հանքավայրի շինարարության պաշտոնական մեկնարկը տրվել է 2016թ-ի օգոստոսի 19-ին: Սա այս պահին Հայաստանում կատարված ամենախոշոր միջազգային ներդրումն է, որն իրականացվել է Միջազգային ֆինանսական կորպորացիայի (IFC) և Վերակառուցման ու զարգացման եվրոպական բանկի չափանիշներին համապատասխան, բնապահպանական և սոցիալական ազդեցությունների գնահատմամբ: Հանքի շահագործումը Հայաստանում իշխանափոխությունից հետո դադարեցվել է, հարուցվել է քրեական գործ` չարաշահումների և բնապահպանական օրենսդրության խախտումների փաստով։
Ամուլսարի ճակատագիրը կլուծվի. կառավարությունը փողը տվեց
Կառավարության հրավերով հանքի տարածքում միջազգային բնապահպանական փորձաքննություն է իրականացվել։ ՀՀ վարչապետ Նիկոլ Փաշինյանը հայտարարել էր, որ հանքը չի շահագործվի, քանի դեռ փորձաքննությունը դրական եզրակացություն չի տվել։
Ամուլսարի խնդիրը. իշխանությունները հույս ունեն հարցը լուծել առանց արբիտրաժային դատարանի