ԵՐԵՎԱՆ, 19 հուլիսի – Sputnik. Մոսկվայի «Շերեմետևո» օդանավակայանում Nordwind Airlines ավիաընկերության Մոսկվա-Երևան չվերթի օդանավն ընդհատել է թռիչքը, որովհետև օդաչուների խցիկում միացել է ծխի ազդանշանը։ Այս մասին հայտնում է ՌԻԱ Նովոստին` նշելով, որ Ռոստրանսնադզորը չծրագրված ստուգում կիրականացնի ավիաընկերությունում։
Ինքնաթիռը պիտի Մոսկվայից հասներ Երևան, բայց օդաչուների խցիկում ծուխ է հայտնվել, որը ներխուժել է նաև սրահ։
Ազդանշանն աշխատել է, երբ օդանավն արդեն եղել է թռիչքուղու վրա: Ինքնաթիռը դադարեցրել է թռիչքը, ուղևորներին սկսել են տարհանել։ Հրմշտոց է սկսվել, որի ժամանակ 8–ը տուժել են։
Օդանավում եղել են 173 ուղևոր և օդանավի անձնակազմի 6 անդամ։
Ռոստրանսնադզորի ներկայացուցիչն ասել է, որ ավիաընկերությունում ստուգում կիրականացվի` պարզելու համար` պահպանվել են արդյոք օդային օրենսդրության պահանջները, թե ոչ։
Նշենք, որ Մոսկվայի ժամանակով ժամը 05։34–ին «Նորդվինդ» պահեստային ինքնաթիռն ընդհատված չվերթի ուղևորներին տեղափոխել է Երևան։
Տվյալներ կան, որ 28–ը հրաժարվել են մեկնել պահեստային ինքնաթիռով։
Նավակներ ինքնաթիռների փոխարեն. ջրհեղեղ Շերեմետևոյում. տեսանյութեր, լուսանկարներ
