ԵՐԵՎԱՆ, 3 օգոստոսի – Sputnik. Երկարատև հիվանդությունից հետո մահացել է երգիչ Վահե Դավթյանը։ Facebook սոցիալական ցանցում այս տեղեկությունը հրապարակել են նրա ընկերները։
«Խորը կսկիծով և շատ մեծ ցավով տեղեկացնեմ, որ երկարատև հիվանդությունից հետո մահացավ սիրված երգիչ, հրաշալի անձնավորություն Վահե Դավթյանը»,– երգչի էջում գրել է ընկերը՝ Արամ Մանուկյանը։
Գրառում է արել նաև երգչուհի Արփինե Բեկջանյանը։
«Ցավ եմ ապրում!!!! Մեր սիրելի Վահե Դավթյան ջան»,– գրել է նա։
Երգչուհին հուլիսի 30-ին մեկ այլ գրառում էլ էր արել Վահե Դավթյանի էջում։
«Վահե ջան, լավ ու բարի տարիներից լավ ընկեր, իմացիր, որ սիրում ու հոգեպես տանջվում ենք քեզ համար!!!! Միշտ մեր Վահե ջան, չհրապարակված երգդ հրապարակեցինք! Որքան ապրում է երգդ, այդքան ապրում ու ապրելու ես դու»,– գրել էր նա։
2017 թվականին medialab–ին տված հարցազրույցում երգիչն ասել էր. «Մի քանի օր առաջ քեֆս լավ էր, սիրտս` բարակ, 12-ամյա տղայիս ասացի` «Որտեղ էլ ապրելիս լինենք, մարմինս անպայման Հայաստանում կթաղես»: Տղաս պատասխանեց, որ Հայաստանը գերեզմանոց չի»:
Նշենք, որ երգչի մոտ ենթաստամոքսային գեղձի քաղցկեղ էր ախտորոշվել։ Նա այս տարվա հուլիսի 20-ին ֆեյսբուքյան իր էջում գրել էր, որ բուժման արդյունավետությունը պարզելու նպատակով կատարված հետազոտության արդյունքներն այնքան էլ հուսադրող չեն եղել. ուռուցքը որոշակի չափով աճել է, բայց չի տարածվել։ Աճը կանխելու նպատակով բժիշկներն առավել ագրեսիվ միջամտություն էին առաջարկել՝ զգալիորեն բարձրացնելով քիմիաթերապիայի բաղադրիչների ուժգնությունը։
«Հուլիսի սկզբին ընդունեցի առաջարկված քիմիայի կուրսը, սակայն օրգանիզմիս ցածր դիմադրողականության պատճառով, այն մեծ վնաս հասցրեց՝ առաջ բերելով սրտի անբավարարություն և շնչառական խնդիրներ, իսկ արյան հետազոտության ցուցանիշներն արձանագրել էին հեմոգլոբինի և սպիտակ գնդիկների խիստ պակաս։ Գնահատելով իրավիճակը, բժիշկները կտրականապես արգելեցին բուժումը շարունակել քիմիաթերապիայի ճանապարհով։ Ելնելով ստեղծված իրավիճակից, անիմաստ է դառնում Ֆրանսիայում մնալը, ուստի որոշում ենք կայացրել վերադառնալ հայրենիք և շարունակել պայքարը այլընտրանքային բուժման մեթոդներով և ամերիկյան կենսաբանական թերապիայի նորագույն մեթոդներով, որոնց կիրառումը դեռևս արգելված է Եվրոպայում»,– գրել էր Դավթյանը։
Նա նշել էր, որ բոլոր ջանքերն ուղղվել են ավանդական դեղաբույսերով ու ճիշտ սննդակարգի միջոցով իմունային համակարգն ամրացնելուն, որպեսզի հնարավոր դառնա հետագա բուժումը։
Հիշեցնենք, որ Վահե Դավթյանը 90-ականներին մեծ ճանաչման հասավ իր «Ճոճանակ», «Գնա», «Անուրջներ», «Կապույտ աչքերով իմ բարի դև» երգերով։
