ԵՐԵՎԱՆ, 7 օգոստոսի — Sputnik. Այսօր Երևանում հարգանքի տուրք մատուցեցին Օսմանյան կայսրությունում տեղի ունեցած ասորիների ցեղասպանության զոհերի հիշատակին։
Ասորիների ցեղասպանության զոհերի հուշարձանին ծաղիկների խոնարհման արարողությանը մասնակցեցին համայնքի, տարբեր կազմակերպությունների ներկայացուցիչներ, ինչպես նաև ԱԺ պատգամավորներ։
Հայաստանի ասորական համայնքի ղեկավար Ռազմիկ Խոսրոևն ընդգծեց, որ Հայաստանում պաշտոնապես ճանաչել են ասորիների ցեղասպանության փաստը, իսկ այսօր երկրում ստեղծել են բոլոր պայմանները ասորական համայնքի ներկայացուցիչների լիարժեք ինտեգրման համար։
«Հայաստանում ասորիներն իրենց լիարժեք քաղաքացի են համարում, կարող են բացել սեփական ուսումնական և մշակութային հաստատությունները, ներկայացնել իրենց խնդիրներն ու հասնել դրանց լուծմանը», – ասաց Խոսրոևը։
ՀՀ ԱԺ պատգամավոր և համայնքի ներկայացուցիչ Արսեն Միխայլովն էլ նշեց, որ Հայաստանում այսօր մոտ 6 հազար ասորի կա։ Թեև ոմանք մեկնում են երկրից, հիմնականում` Ռուսաստան, սակայն միգրացիայի տեմպերը դանդաղում են։ Համայնքում կան գրեթե նույն խնդիրները, ինչ ամբողջ երկրում։
«Սակայն այս օրը բոլորը հետաձգում են իրենց գործերն ու Երևան գալիս` հարգանքի տուրք մատուցելու ցեղասպանության զոհերին», – նշեց պատգամավորը։
Կառավարության աշխատակազմի ազգային փոքրամասնությունների և կրոնի հարցերի վարչության պետ Վարդան Ասատրյանը ՀՀ կառավարության անունից ցավակցություն հայտնեց համայնքի ներկայացուցիչներին։ Նրա խոսքով` երկրի իշխանությունը պատրաստ է աջակցել և օգնել համայնքին կենսական խնդիրների լուծման հարցում։
XX դարի սկզբին Օսմանյան կայսրությունում ավելի քան 2 մլն ասորի էր ապրում, որոնք հայերի և հույների հետ մեկտեղ ցեղասպանության զոհ դարձան։ Ըստ տարբեր աղբյուրների` ասորիների զոհերի թիվը հասել է 750 հազարի։
Ասորիների բնաջնջումը սկսվել է 1915 թվականին և տևել մինչև 1933 թվականը։ Զոհերի հիշատակի օր է ընտրվել օգոստոսի 7-ը, քանի որ 1933 թվականին այդ օրը Սիմել գյուղում ասորիների զանգվածային կոտորած է եղել. միայն մեկ օրում քրիստոնեական երկու եկեղեցիներում ողջ–ողջ այրել են 3000 ասորիների։
Նշենք, որ Հայաստանը 2015 թվականին ճանաչել ու դատապարտել է 1915 թվականին Օսմանյան Թուրքիայում տեղի ունեցած հույների և ասորիների ցեղասպանությունները։
Ուսումնասիրվում են պատմական փաստերը. Հայ եկեղեցին պատասխանել է ասորական համայնքին
