ԵՐԵՎԱՆ, 7 օգոստոսի — Sputnik, Արմենուհի Մխոյան. Գյումրիում այս շաբաթ փոքրերի ու մեծերի համար իր դռները կբացի դելֆինարիումը: Սոչիում արհեստական ակվարիումում ծնված ու մեծացած 12 և 9 տարեկան Սաշա ու Քսյուշա դելֆինները մինչ Գյումրի տեղափոխվելն «աշխատել» են Թավրիզում: Նրանք սևծովյան աֆալին տեսակի դելֆիններ են: Նրանց հետ Գյումրի է բերվել նաև 5 տարեկան հյուսիս-ծովային ծովառյուծը՝ Զայան:
«Ույուտ» անունը կրող դելֆինարիումը ռուսաստանաբնակ, ծնունդով գյումրեցի գործարար Գագիկ Պետրոսյանի ներդրումային ծրագիրն է հարազատ քաղաքում: Վերջինս նմանատիպ 8 դելֆինարում ունի տարբեր երկրներում՝ Ռուսաստանում, Ուկրաինայում, Իրանում և այլուր։
Մինչ դելֆինները հարմարվում են Գյումրիի պայմաններին և պատրաստվում առաջիկա ներկայացմանը, կենդանասերները բողոքում են` նշելով, որ Միացյալ Նահանգներում և Անգլիայում դելֆինարիումներն արգելված են, իսկ որոշ երկրներում էլ դրանց գործունեությունը սահմանափակ է: Փակ տարածքներն, ըստ կենդանասերների, վտանգավոր են դելֆինների համար, այս պայմաններում նրանց կյանքը տասն անգամ կրճատվում է:
Այս պնդումը չեն ընդունում Գյումրու դելֆինարիումի պատասխանատուները: «Դելֆիններն ապրում են, այսպես կոչված, արհեստական, բայց ծովի ջրի բաղադրությանը շատ մոտ ջրում, որտեղ ջրի թթվայնությունը, աղի տոկոսայնությունն ամբողջությամբ համապատասխանում է ծովի ջրին: Այստեղ 600 մետր խորանարդից ավելի ջուր ունենք: Յուրաքանչյուր դելֆինի համար նախատեսվում է 200-250 մետր խորանարդ տարածք:
Ծովային «բժիշկները» Դիլիջանի անտառների գերին են դարձել. ի՞նչ կանեն հյուրանոցի դելֆիններին
Մենք ռեզերվային լողավազան ունենք նրանց բուժման և հատուկ դեպքերում պահելու համար: Դելֆինների համար ստեղծված են բոլոր պայմանները: Սննդով ևս ապահովված են: Ցավալին այն է, որ բողոքողներից որևէ մեկը չի եկել ու չի տեսել այս պայմանները , բայց խոսում են»- նշեց «Ույուտ» դելֆինարիումի տնօրեն Թորգոմ Գևորգյանը` հավելելով, որ այս կենդանիներն արհեստական պայմաններում ծնված և մեծացած են ու նմանատիպ լողավազանն իրենց համար նորմալ է:
«Դելֆինները Սոչիի դելֆինարիումի բնակիչների սերունդներն են, որոնք տեղափոխվել էին Թավրիզ, այնտեղ էլ են դելֆինարիումում ապրել: Բաց ծովում երբեք չեն եղել, այսինքն` Գյումրիի դելֆինարիումում ստեղծված պայմաններն այնպիսին են, որոնց կենդանիները սովոր են»,-նշում է տնօրենը` հավելելով, որ բացի շոու ծրագրից բոլոր ցանկացողների համար նաև հատուկ դելֆինոթերապիա է կազմակերպվելու:
Դելֆինարիումի ճարտարագետ Սերգեյ Մատորինը աշխարհի 17 երկրներում հետևել է դելֆինարիումների չափորոշիչներին, Գյումրիում ևս հետևում է ջրի որակին ու վստահեցնում է՝ դելֆիները հարմարվել են Գյումրու պայմաններին։ «Ինքներդ եք տեսնում` դելֆիներն ուրախ խաղում են, նույնիսկ մենակ՝ առանձ ինչ- որ մեկի, ուրեմն` նրանք իրենց լավ են զգում»,-ասաց Սերգեյ Մատորինը:
Մինչ այս քննարկումները կավարտվեն, 300 նստատեղ ունեցող դելֆինարումն արդեն պատրաստ է, իսկ կենդանիները վերջին պարապմունքներն են անցկացնում: Պատասխանատուները նաև վստահեցնում են՝ մուտքի արժեքը շատ թանկ չի լինի` 3-5 հազար դրամ, իսկ մինչև 3 տարեկան երեխաների մուտքն անվճար է:
