ԵՐԵՎԱՆ, 12 oգոստոսի — Sputnik. Հայ–ադրբեջանական սահմանին ինժեներական աշխատանքների ժամանակ հայկական կողմը մի քանի դիրքերում մարտական դիրքի առավելություն է ձեռք բերել։ Այս մասին լրագրողների հետ ճեպազրույցի ժամանակ ասաց պաշտպանության փոխնախարար Գաբրիել Բալայանը։
4 հուլիսի 2019, 15:39
«Մեր ինժեներական աշխատանքների կատարման արդյունքում ունենք նշանակալի ձեռքբերումներ` ինժեներական զորքերի առջև դրված խնդիրը կատարվում է։ Հայ–ադրբեջանական սահմանին վերջին շրջանում լարված էր, քանի որ հակառակորդը փորձում էր զսպել մեր ձեռքբերումները»,–ասաց նա։
Փոխնախարարի խոսքով`վերջին շրջանում հայ-ադրբեջանական սահմանային լարվածության պատճառը Ադրբեջանի և Հայաստանի` սահմանին տարվող ինժեներական աշխատանքներն էին։ Ըստ նրա` ինժեներական աշխատանքների ժամանակ հակառակորդը փորձում էր որոշ տեղերում դիրքային առավելություն ձեռք բերել, ինչը, սակայն, կասեցվում է։
Փոխնախարարը հայտնեց նաև, որ Հայաստանի վարչապետի և Ադրբեջանի նախագահի միջև օպերատիվ կապի հաստատումը նպաստում է սահմանի լարվածության նվազմանը։
«Վերջին երկու շաբաթվա ընթացքում սահմանին ակնհայտ լարվածության միտումներ չունենք։ Հրդեհներն էլ կարող են կրակոցների հետևանքով լինել, կամ էլ ուղղակի շոգ եղանակից։ Իրավիճակը վերահսկելի է»,–ասաց Բալայանը։
Հիշեցնենք`հուլիսի 27-ին և 28-ին, Հայաստանի պետական սահմանի հյուսիս–արևելյան հատվածում հակառակորդի կրակոցներից սպանվել էր ՀՀ ԶՈւ զինծառայող Արման Բուլղադարյանը, ևս երկու զինվորական վնասվածքներ են ստացել։
