ԵՐԵՎԱՆ, 16 սեպտեմբերի — Sputnik. Գործարար, ակտիվիստ, Reddit կայքի և Initialized Capital վենչուրային ընկերության համահիմնադիր Ալեքսիս Օհանյանի «Առանց թույլտվության» բեսթսելերի հայերեն թարգմանության շնորհանդեսին ներկա կլինի անձամբ Օհանյանը։ Այս մասին հայտնում է «Էդիթ պրինտ» ընկերության մամուլի ծառայությունը։
«Գրքում հեղինակը ներկայացնում է իր հաջողության ուղին՝ մանկությունից մինչև Reddit-ի հիմնադրումն ու դրան հաջորդող իրադարձությունները։ Նա մոտիվացնում է ընթերցողին չսպասել որևէ մեկի թույլտվությանը և գործել»,–նշված է հաղորդագրության մեջ։
«Առանց թույլտվության» բեսթսելերի շնորհանդեսը տեղի կունենա հոկտեմբերի 8-ին։ Հատկանշական է, որ գրքի լույսընծայումը համընկնում է Օհանյանի՝ Հայաստան այցի հետ, և հեղինակը սիրահոժար համաձայնել է ոչ միայն պարզապես ներկա գտնվել շնորհանդեսին, այլև ելույթով հանդես գալ: Գիրքն անգլերենից թարգմանել է Աննա Միրզոյանը:
Ալեքսիս Օհանյանը դստեր հետ հուզիչ լուսանկար է հրապարակել
«Էդիթ Պրինտ» հրատարակչության մարքեթինգի տնօրեն Շավարշ Կարապետյանը նշել է, որ Օհանյանի գրքի շնորհանդեսը իսկապես մեծ իրադարձություն է Հայաստանի գործարար ոլորտում՝ թե՛ ստարտափների, թե՛ կայացած բիզնեսների համար և թե՛ բոլոր նպատակասլաց մարդկանց համար:
Ալեքսիս Օհանյանը ՏՏ ոլորտի ամենակարկառուն ներկայացուցիչներից է: Նրա ապուպապն ու ապուտատը Խարբերդից և Բիթլիսից էին: Ցեղասպանությունից փախչելով՝ նրանք մեկնել էին ԱՄՆ, որտեղ և հաստատվել էին: Համատեղ կյանքի տարիների ընթացքում նրանք 4 երեխա ունեցան՝ Վերան, Ջոնը, որը Ալեքսիսի պապն էր, Էլզան ու Մերին:
Օհանյանը ծանոթ է Facebook-ի հիմնադիր Մարկ Ցուկերբերգի հետ, և Ամերիկայում Ալեքսիսին անվանում են «Հայ Ցուկերբերգ»:
Նա, ի դեպ, հպարտանում է իր հայկական արմատներով և պատրաստ է ամեն կերպ աջակցել Հայաստանի տեխնոլոգիական զարգացմանը, և ոչ միայն:
