ԵՐԵՎԱՆ, 19 սեպտեմբերի — Sputnik. ՀՀ ԱՆ քրեակատարողական ծառայության պետ, գեներալ-մայոր Արթուր Գոյունյանը աշխատանքային այցով եղել է ՀՀ ԱՆ «Գորիս» քրեակատարողական հիմնարկում:
Այս մասին հայտնում է ԱՆ քրեակատարողական ծառայության հանրային կապերի բաժինը։
Շրջելով հիմնարկի բնակելի տարածքում՝ Գոյունյանը տեղում ծանոթացել է կալանավորված անձանց և դատապարտյալների պահման պայմաններին, նրանց իրավունքների պատշաճ իրացմանը: Եղել է զբոսահրապարակում, հանձնուքների ընդունման և տեսակցությունների սենյակներում, ճաշարանում, որտեղ ստուգել է սննդի որակն ու պատրաստման պայմանները, ծանոթացել օրվա ճաշացանկին:
Առանձնահատուկ ուշադրություն է դարձվել հիմնարկի բուժմասի տեխնիկական հագեցվածությանը: Ազատազրկված անձանց հետ առանձնազրույցների ընթացքում հիմնականում բարձրացվել են նրանց պահման պայմանների բարելավմանը, բուժսպասարկմանը, պատժի կրումից պայմանական վաղաժամկետ ազատմանն առնչվող հարցեր:
Խորհրդակցության ժամանակ Արթուր Գոյունյանը հիմնարկի վարչակազմին հրահանգել է արձանագրված թերությունները ողջամիտ ժամկետներում վերացնել, բացառել ցանկացած անօրինական կապերն ազատազրկված անձանց և տեղաբնակների հետ՝ հաշվի առնելով այն հանգամանքը, որ ազատազրկվածների գերակշիռ մասը տեղի բնակիչներ են։
Ա. Գոյունյանը խոսել է նաև ազատազրկված անձանց կողմից բարձրացված առաջնահերթ հարցերին հնարավոր լուծումներ տալու անհրաժեշտության մասին, հանձնարարվել է առանձնահատուկ ուշադրություն դարձնել դատապարտյալների զբաղվածության խնդրին ևս:
