ԵՐԵՎԱՆ, 23 սեպտեմբերի - Sputnik. ՀՀ վարչապետ Նիկոլ Փաշինյանը կարծում է, որ Հայաստան–սփյուռք սահմանները պետք է վերացնել։ Այս մասին վարչապետն ասաց Լոս Անջելեսում լրագրողների հետ հանդիպման ժամանակ։
«Եթե մարդը 2015–ին արտագաղթել է` նա սփյուռքահա՞յ է, թե՞ ոչ։ Իմ կարծիքով` սփյուռքահայ չէ։ Մարդիկ տարբեր պատճառներով Հայաստանից հեռացել են։ 1995-96 թվականներին իմ եղբայրն էլ Հայաստանից է հեռացել, Ռուսաստանում է ապրել։ Հիմա իրեն որպես սփյուռքահայի՞ վերաբերվեմ։ Չեմ կարող։ Կամ իմ դասարանցիներն ու ընկերները, կամ ձեր ընկերները։ Այդ սահմանները պետք է վերանան»,–ասաց նա։
Փաշինյանի խոսքով` ժամանակակից աշխարհում մարդու գտնվելու վայրը հարաբերական երևույթ է` մարդիկ մեկ ամիս մի վայրում են ապրում, հետո` այլ։ Խնդիրն այն է, որ, ըստ վարչապետի, պետք է հասկանալ, թե մարդն իրեն որ երկրի հետ է նույնականացնում։
Փաշինյանը նշեց, որ Հայաստանի խնդիրն էլ այն է, որ աշխարհի տարբեր երկրներում ապրող հայերն իրենց նույնականացնեն հենց Հայաստանի հետ։ Դրա համար, ըստ նրա, կան մի քանի տարբերակներ` նախ բոլոր հայերը պետք է ունենան ՀՀ քաղաքացիություն, տարվա մեջ ինչ–որ ժամանակ Հայաստանում անցկացնեն։
Անդրադառնալով սփյուռքում ապրող հայերի` հայաստանյան ընտրություններին մասնակցել–չմասնակցելուն` Փաշինյանը նշեց, որ օրենքը սահմանում է` յուրաքանչյուր 2000 ընտրողի համար մեկ ընտրական տեղամաս պետք է ապահովել։ Սա, ըստ նրա, կարող է նշանակել, որ ընտրատեղամասերի 80 տոկոսը գտնվեն դրսում և միայն 20 տոկոսը լինի Հայաստանում։
«Մենք հասկանո՞ւմ ենք, թե դա անվտանգության ինչ խնդիրներ կարող է առաջացնել։ Բացի այդ, թեկնածուներն էլ պետք է քարոզարշավ իրականացնեն և ինչպե՞ս են շրջելու տարբեր երկրներով։ Ուստի, այսօրվա կարգավորումը ես ճիշտ եմ համարում,»,–ասաց նա։
Ի դեպ, այսօրվա օրենսդրությամբ` սփյուռքահայերը Հայաստանի ընտրություններին մասնակցելու իրավունք չունեն։
Հիշեցնենք, որ Փաշինյանը Նյու Յորքում կմասնակցի Միավորված ազգերի կազմակերպության Գլխավոր ասամբլեայի 74-րդ նստաշրջանի աշխատանքներին և հանդես կգա ելույթով: Նախատեսվում է Հայաստանի վարչապետի հանդիպումը ՄԱԿ Գլխավոր քարտուղար Անտոնիո Գուտերեշի հետ, տեղի կունենան նաև մի շարք երկկողմ հանդիպումները տարբեր երկրների գործընկերների հետ: Նյու Յորքում Նիկոլ Փաշինյանը կհանդիպի տեղի հայ համայնքի ներկայացուցիչների հետ, կայցելի Թավշյա հեղափոխությանը նվիրված ցուցահանդես և Կոլումբիայի համալսարան:
Ի դեպ, ԱՄՆ–ում է նաև ՀՀ արտաքին գործերի նախարար Զոհրաբ Մնացականյանը, որն այսօր կհանդիպի Ադրբեջանի արտաքին գործերի նախարար Էլմար Մամեդյարովի հետ։
