10:32 02 հուլիսի 2020
Ուղիղ եթեր
  • USD482.52
  • GBP598.08
  • EUR540.76
  • RUB6.79
Հասարակություն
Ստանալ կարճ հղումը
50510

Երևանում բնակելի նոր շենքերի շինարարությունն առավել ակտիվ է Նոր Նորք, Ավան, Դավթաշեն ու Աջափնյակ վարչական շրջաններում, բայց առաջիկայում կարող են ակտիվանալ նաև Մալաթիա–Սեբաստիան ու Շենգավիթը։

ԵՐԵՎԱՆ, 23 սեպտեմբերի — Sputnik. Հայաստանում բնակարանների և անհատական տների գները, պաշտոնական վիճակագրության համաձայն, 2017թ–ից պարբերաբար աճում են, և անշարժ գույքի առուվաճառքով զբաղվող ընկերության բիզնեսի զարգացման գծով տնօրեն Էդուարդ Ապրիյանի դիտարկմամբ` կշարունակեն աճել։ Նա այս մասին ասաց Sputnik Արմենիայի հետ զրույցում։

«Հայաստանյան անշարժ գույքի շուկայում պահանջարկը կա, և առաջիկայում էլ ոչ միայն չի նվազի, այլև կավելանա»,– վստահեցրեց նա։

Ընդ որում, պահանջարկն առավել բարձր է նորակառույց շենքերում ու թաղամասերում։ Գնորդները ձգտում են ձեռք բերել նոր, նորաոճ, ոչ խորհրդային ստանդարտ դիզայնով բնակարաններ։ Բայց ամենաորոշիչ գործոնը եկամտահարկի հաշվին հիփոթեքային վարկի մարման հնարավորությունն է։

«Բնակարաններն այսպես թե այնպես մեզ մոտ վաճառվում են մեծ մասամբ հիփոթեքային վարկավորմամբ։ Բայց, քանի որ կա եկամտահարկ, որն ուղղվում է հիփոթեքային վարկի մարմանը, բոլոր գնորդներն առաջին հերթին գերադասում են բնակարան ձեռք բերել առաջնային շուկայից»,– ասաց մասնագետը։

Բայց քանի որ կառուցապատողներն առաջարկում են դեռ շինարարության կամ նույնիսկ նախագծային փուլում գտնվող բնակարաններ, ապա այն գնորդները, որոնք բնակարանի անհետաձգելի խնդիր ունեն ու չեն կարող երկար սպասել, ստիպված են լինում իրենց պահանջարկը բավարարել երկրորդային շուկայի, հիմնականում խորհրդային տարիներին կառուցված բնակարաններով։

Երկրորդային շուկային են դիմում նաև այն գնորդները, որոնք ինչ–ինչ պատճառներով մերժում են ստանում բանկերից ու վարկային կազմակերպություններից։ Այս պահանջարկի հաշվին, փաստորեն, չեն նվազում նաև «հին» բնակարանների գները։

«Հետևելով շուկային` մենք անգամ երբեմն տեսնում ենք, որ բնակարանների նկատմամբ պահանջարկն ավելի բարձր է, քան առաջարկը։ Քաղաքացին ուզում է բնակարան ունենալ, և Հայաստանի միջին վիճակագրական ընտանիքը կարող է իրեն թույլ տալ ձեռք բերել բնակարան։ Այլևս պետք չէ միայն պետական պաշտոնյա կամ մասնավոր ընկերության շատ բարձր աշխատավարձ ստացող աշխատակից լինել` այդ արտոնություններից օգտվելու համար»,– ասաց Ապրիյանը։

Բնակարանաշինության բումի մասին է վկայում նաև հողատարածքների վաճառքի գործարքների աճը։ Ապրիյանի դիտարկմամբ` հողատարածքները հիմնականում ձեռք են բերում կառուցապատողները` բազմաբնակարան շենքերի կամ բնակելի թաղամասերի շինարարության նպատակով։ Առավել մեծ պահանջարկ ունեն Երևանում ու Կենտրոնին հնարավորինս մոտ գտնվող հողատարածքները։

«Բնականաբար, յուրաքանչյուր շինարար կատարում է նույն ծախսը, և տարբերություն չկա` դա կառույց է Կենտրոնում, թե, ասենք, Նոր Նորքում։ Բայց որքան Կենտրոնին մոտ է, այնքան կառուցապատողի շահույթն ավելի մեծ է լինում»,– ասում է Ապրիյանը։

Բայց քանի որ Կենտրոնում գրեթե ազատ տարածք չի մնացել, այդտեղ հողի շուկայական արժեքը զգալիորեն բարձրացել է։ Հետևաբար, ներկա պահին հողատարածքների վաճառքի տեսանկյունից առավել ակտիվ են Նոր Նորքը, Ավանը, Դավթաշենն ու Աջափնյակը։

Ապրիյանը հայտնեց, որ իրենց կազմակերպությանը վերջերս կառուցապատողներ են դիմել, որոնք ցանկություն են հայտնել հողատարածքներ գնել Մալաթիա–Սեբաստիայում ու Շենգավիթում։

Մայրաքաղաքից դուրս կառուցապատող ընկերություններն ավելի շատ ոչ թե բնակարաններ, այլ հյուրանոցներ և հյուրատներ են կառուցում կամ դրանց կառուցման համար հողեր գնում։ Ապրիյանի խոսքով` համապատասխան հողատարածքների պահանջարկն այսօր հատկապես մեծ է Շիրակի մարզի Գյումրի քաղաքում, Տավուշում, Լոռիում ու Սյունիքում։

Նշենք, որ Անշարժ գույքի կադաստրի հրապարակած պաշտոնական վիճակագրության համաձայն` օգոստոսին Երևանում բնակարանների առուվաճառքը հուլիսի համեմատ աճել է 7.6 %-ով։

Մայրաքաղաքում բնակարանների 1 քառակուսի մետրի արժեքը հուլիսի համեմատ աճել է 1.1 %-ով, իսկ 2018 թվականի օգոստոսի համեմատ՝ 10.4 %-ով:

Մարզերում բնակարանների արժեքը 1 քառակուսի մետրի հաշվարկով հուլիսի համեմատ աճել է 0.3 %-ով:

2019 թվականի օգոստոսին Հայաստանում գրանցվել է անշարժ գույքի առուվաճառքի 15 507 գործարք, ինչը 2019 թվականի հուլիսի համեմատ քիչ է 3.5 %-ով, 2018 թվականի օգոստոսի համեմատ` շատ 11.9 %-ով:

Ըստ թեմայի

Քաղաքացին մեծ եկամուտ ունի, բայց չի կարող ցույց տալ. հիփոթեքի խնդիրը
Հայաստանում վարկային տեսակներից ամենաարագն աճում է հիփոթեքի ծավալը. ԿԲ–ի մասնագետ
Չես կարող վճարել` արձակուրդ վերցրու. հիփոթեքային վարկը հնարավոր կլինի մի քանի ամիս չվճարել
թեգերը:
Երևան, Հիփոթեքային վարկ, բնակարան, Հայաստան

Գլխավոր թեմաներ