ԵՐԵՎԱՆ, 24 սեպտեմբերի — Sputnik. ԵԿՄ նախկին նախագահ, գեներալ–լեյտենանտ Մանվել Գրիգորյանը կշարունակի մնալ կալանքի տակ։ Այս մասին Երևանի ընդհանուր իրավասության դատարանում ընթացող հերթական դատական նիստում հայտարարեց դատավոր Մնացական Մարտիրոսյանը։
«Դատարանը որոշել է մերժել Գրիգորյանի պաշտպանների` նրան գրավի դիմաց ազատ արձակելու միջնորդությունը, քանի որ այն անհիմն է»,–ասաց դատավորը։
Այսօրվա դատական նիստն ավարտվեց. հաջորդ նիստը տեղի կունենա հոկտեմբերի 1–ին, ժամը 12։00–ին։
Հիշեցնենք, որ պաշտպաններն այսօր դատարանին միջնորդել էին կալանքից ազատել Գրիգորյանին պատկանող գույքի մի մասը` 7 գույք։ Բոլոր տարածքները գտնվում են Արմավիրի մարզի Էջմիածին քաղաքում։ Դրանցից 6-ը հասարակական նշանակության տարածքներ են` գրասենյակներ, խանութներ, մեկը` տաղավար` Նար Դոսի 3/1 հասցեում։
Նշենք, որ ցանկում հիշատակված Մաշտոցի 19 հասցեում էլ գործում է «Երկրապահ Սեքյուրիթի» պահնորդական ծառայությունը։
Կրակոցներ Արմավիրում. հոլովվում է Մանվել Գրիգորյանի եղբորորդու անունը
Միջնորդությունը ներկայացնելուց հետո դատավոր Մնացական Մարտիրոսյանը տեղեկացրեց, որ թվարկած գույքից 5-ը Մանվել Գրիգորյանի անունով է, 2-ը` նրան պատկանող կազմակերպության:
Հունիսի 6–ից նա բուժում է ստանում «Նաիրի» ԲԿ–ում։
Մանվել Գրիգորյանի վիճակը ժամ ժամի վատանում է, բժշկական եզրակացությունը՝ ուշանում. պաշտպան
Գրիգորյանը մեղադրվում է 6 հոդվածով` ապօրինի զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ դրամի հարկերի վճարումից խուսափելու, պետական միջոցներից ավելի քան 1 միլիարդ դրամ վատնելու և շորթմամբ 37 միլիոն դրամ արժողությամբ գույքի հափշտակությունը կազմակերպելու մեջ:
Նրան մեղադրանք է առաջադրվել 2018 թ. հունիսի 19-ին։
