ԵՐԵՎԱՆ, 3 հոկտեմբերի — Sputnik. «Իմ քայլը» խմբակցության պատգամավոր Արման Եղոյանի խոսքով` ՍԴ նախագահ Հրայր Թովմասյանը հասարակությանը ոչ թե սև ու սպիտակի, այլ հայի ու ադրբեջանցու է բաժանում ։ Այս մասին ԱԺ–ում Եղոյանն ասաց «Իմ քայլը» խմբակցության ներկայացրած` Թովմասյանի լիազորությունները դադարեցնելու նախագծի քննարկման ժամանակ։
Նշենք, որ ԱԺ–ում իրավիճակը բավական թեժ է. պատգամավորներն այժմ հանդես են գալիս ելույթներով։
«Իր հարցազրույցում Թովմասյանն ասում է, որ ՍԴ նախագահի պաշտոնում մնալով ինքը սահման է պահում, իրեն տրված սահմանը։ Հրայր Թովմասյանն ուզում է ասել` մենք ադրբեջանցինե՞ր ենք։ Էս ինչ բառապաշար է, էս ինչ խոսալու ձև է։ Ո՞վ է ադրբեջանցին, ո՞վ հայը։ Ուզում է ասել` իր մյուս գործընկերները հանձնել են տարածքը, ինքը չի՞ հանձնում։ Ինչո՞ւ է իր նախկին գործընկերներին վիրավորում»,–ասաց նա։
Եղոյանն ասաց, թե «թող իր վրա շատ չվերցնի Թովմասյանը»։
«Իմ քայլը» խմբակցության ղեկավար Լիլիթ Մակունցն էլ ասաց, որ հուսով է` ՍԴ դատավորները որոշում կայացնելիս չեն անձնավորի հարցը և իրենց որոշումները կներկայացնեն իրավական հիմքերից ելնելով։
Պատճառը փաստերն են. ԱԺ–ն քննարկում է Թովմասյանի լիազորությունները դադարեցնելու հարցը
Մակունցի խոսքով` ՍԴ–ն չի վայելում ՀՀ քաղաքացիների վստահությունը, և դա պայմանավորված է տարիներ շարունակ կեղծված ընտրությունների լեգիտիմացմամբ, ինչպես նաև սեփական հայտարարությունների նկատմամբ անհետևողականությամբ։
«ՍԴ–ն պետք է լինի այն մարմինը, որի որոշումները ոչ թե պետք է լինեն փրկօղակ օրինազանցությունները քողարկելու համար, այլ օրինականության երկաթե ամրագրում։ ՍԴ–ն պետք է ապաքաղաքական լինի»,–ասաց Մակունցը։
ՍԴ-ն Թովմասյանի լիազորությունները դադարեցնելու իր կարծիքը պետք է հիմնավորի. Գրիգորյան
Նշենք, որ Թովմասյանը չի մասնակցում նիստին. առավոտյան նա հայտարարություն էր տարածել, թե պատշաճ չի ծանուցվել։
Հիշեցնենք, որ եթե ԱԺ պատգամավորների 3/5–ը նախագծին հավանություն տա, Թովմասյանի լիազորությունների դադարեցման հարցը արդեն կքննարկի ՍԴ–ն։
