ԵՐԵՎԱՆ, 8 հոկտեմբերի – Sputnik. ՀՀ Արմավիրի մարզի Էջմիածին քաղաքը տոնում է իր 2704–ամյակը։ Տոնի առթիվ Էջմիածին քաղաքի հենց սրտում՝ Մաշտոց 28 հասցեում, այսօր պաշտոնապես բացվեց առաջին «խելացի» կանգառը, որը քաղաքացիներին հնարավորություն կտա տեղադրված սարքերի միջոցով հետևել իրենց անհրաժեշտ տրանսպորտային միջոցի երթուղուն։
«Այս կանգառը մեկն է այն 8 կանգառներից, որոնք այս տարի պետք է տեղադրվեն Էջմիածնում: «Խելացի կանգառ» ՍՊԸ-ն ուսումնասիրել է միջազգային փորձը, որտեղ կան այս խելացի կանգառները։ Փորձել ենք վերցնել լավագույն օրինակը և կիրառել մեզ մոտ։ Այս կանգառը ոչ միայն առաջինն է Հայաստանում, այլև ողջ տարածաշրջանում»,– Sputnik Արմենիային այս մասին ասաց Էջմիածնի քաղաքապետ Դիանա Գասպարյանը։
Նշենք, որ կանգառում տեղադրված են հատուկ էկրաններ, որոնք ցույց են տալիս, թե որ տրանսպորտային միջոցը որքան ժամանակ հետո կհասնի կանգառ։ Նույն տեղեկությունը երևում է նաև վազող տողի միջոցով։
Կանգառները հարմարեցված են հենաշարժողական ու լսողական խնդիրներ ունեցող անձանց համար։
Ներսում նաև տեղեկատվական հատուկ վահանակ է տեղադրված զբոսաշրջիկների համար, որտեղ հստակ նշված է, թե տարածքում որտեղ կարող են սնվել, հանգստանալ, լավ ժամանակ անցկացնել։
«Մեր քաղաքը կդառնա այնպիսին, ինչպիսին կար». Չարենցավանում նոր «խելացի» համակարգ են ստեղծել
Կանգառում տեղադրված են նաև հատուկ աղբամաններ աղբը տեսակավորելու համար։ Կանգառն ունի ձմռանը տաքացվող, ամռանը սառեցվող համակարգեր, էլեկտրոնային սարքերի լիցքավորման հնարավորություն, անվճար Wi-Fi, վենդորային սարքեր սուրճի և քաղցրեղենի համար, բանկոմատ, վճարային տերմինալ։
