ԵՐԵՎԱՆ, 13 հոկտեմբերի – Sputnik. Մոդել Սուսաննա Եգորյանը Հայաստանում Instagram-ի իր էջում նոր տեսանյութ է հրապարակել և նշել, որ զբոսնում է Հյուսիսային պողոտայում:
«Մայրս լավագույն օպերատորն է»,- տեսանյութին կից գրել է մոդելը:
Посмотреть эту публикацию в Instagram
Հիշեցնենք, որ նա օրեր առաջ դժգոհել էր Ղրղըզստանի կառավարությունից` նշելով, որ կառավարությունը չի աջակցում ստեղծագործ մարդկանց։ Մոդելը պատմել էր, որ ինքը Ղրղըզստանը ներկայացրել է «Միսս Ասիա 2019» գեղեցկության մրցույթում և հաղթել, սակայն կառավարությունից նրան շնորհակալություն չեն հայտնել: Սա պատճառ է դարձել, որ մոդելը սկսի մտածել Ղրղըզստանի քաղաքացիությունից հրաժարվելու մասին:
«Ես հիասթափված եմ Ղրղզստանի կառավարությունից և իշխանությունից: Իմ այս հայտարարության համար, մարդիկ կարող են կամ ինձ պաշտպանել, կամ մեղադրել, միևնույն է, արդեն սովոր եմ: Ես գրում եմ այն, ինչ կա: Կառավարությունը չի հարգում իր ժողովրդին: Առաջին անգամ Ղրղզստանը հաղթեց գեղեցկության միջազգային մրցույթում: Տեղեկատվությունը լուսաբանեցին նույնիսկ արտասահմանում: Ի՞նչ օգուտ դրանից: Նրանք բացի այն, որ ինձ որևէ մրցանակ չտվեցին, պաշտոնական հանդիպում չկազմակերպեցին, անգամ շնորհակալություն չհայտնեցին... Մոտ ապագայում, կարծում եմ, կփոխեմ քաղաքացիությունս», - գրել է Սուսաննան:
Հիշեցնենք, որ 2017թ-ին Սուսաննան հայտնվել էր սկանդալում։ Եգորյանը World NextTop Model 2017-ի եզրափակիչ փուլում հանդես էր եկել հայկական ժապավենով։ Աղջկան հայրենիքում մեղադրել էին դավաճանության մեջ։ Ավելի ուշ մոդելը բացատրել էր, որ մրցույթում Ղրղզստանը չի ներկայացրել, ուստի չէր կարող դավաճանել երկրին։
Հայուհին 19 տարեկան է, սովորում է Ղրղզստանի պետական իրավաբանական ակադեմիայում՝ «Իրավունքի և ձեռնարկատիրության» ֆակուլտետում։ Արդեն 4 տարի է՝ մոդելային ինդուստրիայում է։ Այս ընթացքում հասցրել է մի քանի տիտղոսի արժանանալ`«Ղրղզստանի առաջին փոխմիսս 2016», «Miss Globe Ղրղզստան 2016», «Միսս պոդիում 2017» «Միսս Ասիա 2019» և այլն։
