ԵՐԵՎԱՆ, հոկտեմբերի 25 - Sputnik. Պետական եկամուտների կոմիտեի մաքսանենգության դեմ պայքարի վարչության աշխատակիցներն օրերս Բագրատաշենի սահմանային անցակետում զննության են ենթարկել Վրաստանից Հայաստան ժամանած ՀՀ քաղաքացի Ա.Ա-ի շահագործվող տրանսպորտային միջոցը: Այս մասին հայտնում է ՀՀ պետեկամուտների կոմիտեն։
«Իրականացված հսկողության արդյունքում վարչության աշխաատակիցները հայտնաբերել են տարբեր մոդելի 62 բջջային հեռախոս: Որպես թաքստոց հանդիսացել է ավտոմեքենայի բեռնախցիկի ստորին հատվածը»,- նշված է ՊԵԿ-ի տարածած հաղորդագրության մեջ:
Դեպքի առթիվ` ՊԵԿ մաքսանենգության դեմ պայքարի վարչությունում` ՀՀ մաքսային օրենսգրքի 201-րդ հոդվածի (մաքսային տարածքից դուրս վերամշակումից հետո ստացվելիք նվազագույն արդյունք) իրավախախտման հատկանիշներով նախապատրաստված նյութերը, տրամադրվել են ՊԵԿ իրավաբանական վարչությանը:
