ԵՐԵՎԱՆ, 24 նոյեմբերի — Sputnik. Երևանում մեկնարկել է բազմաբնակարան շենքերի հին վերելակների փոխման գործընթացը։ Այս մասին Facebook-ի իր էջում գրել է Երևանի քաղաքապետի մամուլի քարտուղար Հակոբ Կարապետյանը։
«Այս օրերին տասը վարչական շրջանների 20 բազմաբնակարաններում վերելակները փոխարինվում են»,–տեղեկացրել է նա:
Համաձայն գրառման` վերելակների տեխնիկական բնութագրերում ընդգծված է դրանց ներառականության սկզբունքը. վերելակները կահավորված են տեսողության խնդիրներով մարդկանց հարմար ընթեռնելի սեղմակներով, ձայնային ազդանշանային համակարգով, իսկ սեղմակների վահանակները տեղադրված են համապատասխան բարձրության վրա, որպեսզի սայլակով մարդիկ կարողանան օգտվել դրանցից:
Երևանի վերելակների 70 տոկոսը 40 տարեկան և ավելի հին են: Փոխարինման ենթակա շուրջ 3500 վերելակ կա: «Ներկայումս քաղաքապետարանը փորձնական ծրագիր է իրականացնում: Հիմնական ֆոնդը փոխարինվելու է փոխառու միջոցներով»,–գրել է նա:
Ի՞նչ վիճակում են Երևանի շենքերի վերելակները. ԱԻՆ–ը ստուգումներ է անցկացրել
Հիշեցնենք, որ հունիսի 26–ին Երևանի փոխքաղաքապետ Հայկ Սարգսյանը ասել էր, որ սեպտեմբեր–հոկտեմբեր ամիսներին 10 վարչական շրջաններից յուրաքանչյուրում 2 նոր` եվրոպական չափանիշների համապատասխան վերելակներ կգործարկեն։ Նրա խոսքով` դրանք ծիծեռնակը կլինեն այն 3500 վերելակների փոխարինման պրոցեսի, որը նախատեսում են սկսել 2020–ին։
Հիշեցնենք նաև, որ ավելի վաղ` մայիսի 10–ին, Երևանի քաղաքապետ Հայկ Մարությանն ասել էր, որ իրենք կփոխարինեն վերելակը, իսկ բնակիչները տարիների ընթացքում գումարը կվճարեն։ Նման մոտեցումը բազմաթիվ քննարկումների տեղիք էր տվել։
