ԵՐԵՎԱՆ, 28 նոյեմբերի - Sputnik. Հայաստանում գազի սակագինը մինչև 2020 թվականի ապրիլի 1-ը չի բարձրանա։ Այս մասին լրագրողներին հայտնեց ՀՀ փոխվարչապետ Մհեր Գրիգորյանը` Երևանում անցկացվող Եվրասիական միության երկրների վերահսկիչ պալատների համատեղ նիստում։
Ռուսաստանի կառավարության և «Գազպրոմ» կորպորացիայի հետ բանակցությունները շարունակվում են եռակողմ ձևաչափով, ավելացրեց նա։ Հայկական կողմի նպատակն այն է, որ գների տատանումները զգայուն չլինեն սպառողների և ձեռնարկությունների համար։ Ինչպիսին կլինի գինը սահմանին, դեռ քննարկվում է, սակայն մինչև ապրիլի 1-ը սակագինը չի փոխվի։
«Բոլորին հետաքրքրում է հենց վերջնական սակագինը, և այդ առումով պատասխանը սա է», – նշեց Գրիգորյանը։
Գրիգորյանը նշեց, որ Հայաստանը պատրաստ է փոխշահավետ համաձայնագրեր դիտարկել նաև այլ երկրների հետ, և ցանկացած հնարավորություն պետք է գնահատել և հաշվի առնել։ Մասնավորապես, Իրանի հետ բարտերային բանակցություններ են ընթանում «գազ` ապրանքների փոխարեն» սխեմայով։
Ջրի գինը որոշվեց. պետությունը չի սուբսիդավորի, բայց քաղաքացիները կվճարեն նույն գինը
«Այդ հարցերը մեր օրակարգում են, սակայն որևէ կոնկրետ բան դեռ ասել չեմ կարող։ Քննարկվում են մատակարարումների ծավալները և ենթակառուցվածքների հնարավորությունները», – ասաց Գրիգորյանը։
ԵԱՏՄ–ում կձևավորվի գազի միասնական շուկա. Փաշինյանը խոսել է գնի կայունացման մասին
Հիշեցնենք, որ 2019 թվականի հունվարի 1-ից ռուսական գազի սակագինը Հայաստանի համար բարձրացավ և 1000 խմ–ի դիմաց 150–ից հասավ 165 դոլարի։ Սակայն վերջնական սակագինը սպառողների համար դեռ նույնն է (տարբերությունն իր վրա է վերցրել «Գազպրոմի» դուստր ձեռնարկություն` «Գազպրոմ Արմենիան»)։
