ԵՐԵՎԱՆ, 2 դեկտեմբերի — Sputnik. Կապանն ընտրվել է ՀՀ 2020 թվականի երիտասարդական մայրաքաղաք: Այս մասին լրագրողների հետ հանդիպման ժամանակ հայտնեց ՀՀ ԿԳՄՍ նախարարի տեղակալ Գևորգ Լոռեցյանը:
«ՀՀ ԿԳՄՍ նախարարությունը 2020 թվականին Կապանում կիրականացնի տեղական, միջազգային, ինչպես նաև դրամաշնորհային երիտասարդական ծրագրեր՝ դրանցում ներգրավվելով համայնքի և մարզի երիտասարդներին և երիտասարդական կազմակերպություններին»,-ասաց փոխնախարարը:
Մրցույթին մասնակցության հայտ են ներկայացրել Արմավիր, Կապան, Հրազդան, Գավառ և Գորիս քաղաքները: Հաղթողը որոշվել է կարճ հաղորդագրությամբ և հայտերի փորձագիտական գնահատման արդյունքում:
«Նոյեմբերի 5-25-ը քաղաքացիները sms հաղորդագրությամբ քվեարկել են իրենց նախընտրելի քաղաքի համար, իսկ 15-ից մրցույթի կազմկոմիտեն`փորձագետների հետ միասին, այցելել են հայտատու քաղաքների` մարզական, մշակութային, ժամանցի հաստատություններ և ծանոթացել են տեղի երիտասարդների հետ»,-նշեց Լոռեցյանը:
«Քարտեզահայրը» կօգնի ուտելու սիրահարներին, նեյրոցանցը` էպիլեպսիայով հիվանդներին
Ըստ փոխնախարարի` այս մրցույթով ԿԳՄՍ նախարարությունը նպատակ ունի նպաստել հանրապետության համայնքների համաչափ զարգացմանը, խթանել երիտասարդական նախաձեռնողականությունը, համայնքների միջև բարեխիղճ և գործընկերային հարաբերությունները:
Էջմիածինն արդեն առաջին խելացի կանգառն ունի. մարդիկ կարող են սուրճ խմելով սպասել ավտոբուսին
Հիշեցնենք, որ մրցութային հանձնաժողովը 2019 թվականին Հայաստանի երիտասարդական մայրաքաղաք էր հռչակել Վանաձորը։